Reportajen Juvinal Cabral dos Santos
Media online, TV, Radio no Jornal nia reprezenta jornalista hamutuk nain sanulu resin hitu (17) sei halao media tour loron rua iha munisipiu Lautem postu administrativu Lorehe, hodi halo kobertura ba asuntu mudansa klimatika ne’ebe fo impaktu ba komunidade sira nia moris
“Atu ko’alia oituan kona ba media tour sei halao husi Asosiasaun Jornalista Timor-Lorosa’e (AJTL) programa ida ne’e ita bolu dehan asaun justisa klimatika Oxfam servisu hamutuk ho AJTL nu’udar parseiru estratejiku ida atu kontinua foti papel ho asuntu mudansa klimatika ninia impaktu ba komunidade sira liuliu ba ema vulneravel, feto no ema ho defisiensia sira, dehan Strategy and Engagement Lead Oxfam in Timor-Leste, Adilson da Costa Junior iha Konferensia imprensa, Oxfam hudi laran 29/05/2024”
Adilson hatutan iha loron rua liu ba Segunda no Tersa-feira (27-28 fulan Maiu 2024) ne’e Oxfam servisu hamutuk ho AJTL molok halo media tour organiza workshop konvida organizasaun naun govermental Lao Hamutuk fahe esperensia no informasaun liga ho orsamentu ne’ebé governu iha ba asuntu mudansa klimatika ne’e
“Aleinde ne’e mos ita konvida organizasaun naun govermental Permakultura Timor-Leste (PERMATIL) no mos Klibur Estudante Juventude Suku Sagadate (KEJUSS) hanesan grupu movimentu joven foinsa’e sira husi Sagadate ne’ebé durante ne’e halo mos servisu ba asuntu konservasaun bee iha postu administrativu Laga”
Adilson hatutan media tour ida ne’e sei hala’o durante loron rua media sira sei vizita munisipiu Lautem, postu administrativu Lore no halo koobertura kona ba asuntu oioin ne’ebé jornalista sira deskuti ona iha workshop balun liga ho agrikultura, infraestrutura estrada, produsaun agrikola no mos asuntu ambiente
“Ami hanoin katak programa media tour ida ne’e lao ho di’ak ita sei hetan informasaun naton sai evidensia hodi kontinua informasaun ba governu no politika nain sira oinsa programa ka politika no orsamentu ba asuntu sira ne’ebé prioridade no importante iha situasaun mudansa klimatika nia impaktu ba komunidade sira nia moris iha area rural”, dehan Adilson
Iha fatin hanesan prezidente AJTL Zevonia Vieira hateten apresia tebes kolaborasaun ho Oxfam iha Timor-Leste ne’ebé mak fo importánsia, involve AJTL hodi hare asuntu mudansa klimatika, no oinsa halo advokasia makaas liu-tan importánsia justisa klimátika.
“AJTL kontinua fo espasu ba nia membru sira hakerek barak liu halo koobertura barak liu kona ba lian kbiit laek sira ne’ebé mak injustisa hasoru mudansa klimatika moris hanesan toos nain, feto vulneravel sira, ema ho defisiensia no ferik katuas ne’ebé mak hetan impaktu boot husi mudansa klimatika, dehan prezidente AJTL”
Nia hatutan AJTL enkoraza nafatin nia membru sira hodi kobertura lian husi kbiit laek sira atu nune’e ajuda governu no estadu atu tau importansia ba problema hasoru mudansa klimatika no oinsa mak tau prioridade ba asuntu justisa klimatika hadia estrada no kontrola ema tesi ai arbiru
“Espera jornalista sira iha reportagen sensivel ba asuntu hirak ne’e tanba imi nia papel importante los, AJTL kontinua servisu ho Oxfam hodi promove no luta ba iha justisa klimatika. Ita hatene katak justisa klimatika akontese tanba ema kiik no povu kiik mak afeta liu ba iha problema mudansa klimatika”
Prezidente AJTL haktuir media tour dahuluk lansa apoiu husi projetu Oxfam iha Hong Kong sei ba munisipiu Lautem, postu administrativu Lore atu bele foti asuntu sira ne’ebé durante jornalista sira seidauk hakerek ba iha problema asesu bee, estrada at asuntu setor produtivu sira ne’ebé mak media sira seidauk too iha ne’eba
“Asosiasaun Jornalista Timor-Lorosa’e fo espasu ida ne’e ba jornalista sira espera katak imi ba hetan informasaun ne’ebé mak interesante iha valor notisia, no imi nia advokasia ne’e bele ajuda ita nia governu no estadu atu nune’e bele tau politika no mos tau orsamentu ne’ebé di’ak hodi hadia tuir preukupasaun kbiit laek sira ezizi too ohin loron”