Home Notisia Sosiedade Sivil Sei Organiza Asean People Forum Hodi Koalia Asuntu Direitu Umanu,...

Sosiedade Sivil Sei Organiza Asean People Forum Hodi Koalia Asuntu Direitu Umanu, Demokrasia, Ekolojia no Seguransa

534
0
Steering Commite APF halo konferensia imprensa. [Foto: Silvino | 01.06.2024]

Reportajen Silvino Freitas

Sorumutuk Steering Committee husi sosiedade sivíl iha Sudeste Aziátiku ba Asian People Forum (APF) nian, organiza espasu hodi rezolve asuntu 6 iha konferénsia ne’ebé sei hala’o iha setembro durante semana rua tinan ne’e, konferénsia ne’e sosiedade-sivíl husi Timor Leste maka sei sai uma nain ba eventu internasionál ne’e.

Koordenadora APF, Elisabeth Lino de Araújo dehan, APF ne’e maka plataforma rejionál husi sosiedade-sivil iha rejiaun Sudeste Aziatiku nian ne’ebé hala’o ona sorumutu durante loron 3 iha Dili kona-ba issue sira ne’ebé liga ho direitu umanu, demokrasia, ekolojia no seguránsa, nune’e APF ne’e preparadu ona ho asuntu sira ba konferénsia ne’ebé sei realiza iha Setembru tinan ne’e.

“Desizaun signifikante ne’ebé lori ba konferénsia iha loron 25 to’o 27 maka ho tema ‘ba povu ida livre demokrasia no soberania iha Sudeste Aziátiku nian” dehan Elisabeth ba jornalista liuhusi konferénsia imprensa ne’ebé hala’o iha salaun HAK Faról, (31/05).

Koordenadora ne’e klarifika, asuntu interesante ne’ebé sei organiza hodi rezolve maka (1) ema servisu nain, neoliberalizmu no rejionalizmu alternativu,(2) violénsia estadu, militarizmu, libertasaun nasionál no demokrasia, (3) tékniku monopóliu, autoritáriu dijitál no liberdade internet, (4) krize ekolojia, direitu ambiental, asuntu agrikultura no urbanu, (5) minoridade, povu marjinalizadu no justisa jéneru, (6) harii paz, seguránsa no justisa tranzitóriu.

“Konferénsia Setembru sei diskute mós kona-ba tópiku estratéjiku sira hanesan krize ekolojia soberania ai-han, ekonomia rejionál, direitu umanu, solidariedade internasionál, seguransa rejionál, traballadór imigrasaun sira, sei foka liu mós ba krize Myanmar nian” dehan Elisabeth.

Koordenadora ne’e konklui, partisipa iha enkontru APF ne’e reprezenta rejionál steering committee mai husi nasaun sira iha Sudeste Aziátiku nian ne’ebé partisipa direta no balun liu via online, nune’e konferénsia ne’ebé sei hala’o iha Setembru durante semana 2 hafoin apóstolu Paulo vizita Timor Leste.

Print Friendly, PDF & Email

LEAVE A REPLY

Please enter your comment!
Please enter your name here