Reportajen Cresencia de Castro
Alumni Parlamentu Foinsa’e Timor-Leste (APFTL) servisu hamutuk ho The UN Resident Coordinator’s Office iha Timor-Leste, realiza workshop konaba Pact of the Future.
Liuhusi workshop ne’e Prezidente APFTL, Zaulino Gomes da Silva dehan atu halibur joven sira nia hanoin no rekomendasaun, hodi aprezenta iha “Simeira ba Futuru Nian” iha ONU, ne’ebe sei akontese iha fulan Setembru 2024, tanba relasiona ho joven sira nia lian no esperansa nune mundu tomak sei rona.
“Summit of the future” hanesan sorumutu global ida ne’ebe inisia rasik husi ONU ho objetivu atu harii akordu foun ida ho naran “pact for the future”, ne’ebe sei kompostu husi elementu importante oioin, inklui “declaration for the future” no “global digital impact” dehan Zaulino iha Suai room Timor Plaza, 05/08.
Nia dehan tan sorumutu ida ne’e foka oinsa ita nu’udar komunidade global, servisu hamutuk hodi bele hasoru dezafiu boot sira iha sekulu XXI nian no garante futuru ida ne’ebe sustentavel no inkluzivu ba ema hotu, no diak ba ita nia planeta.
Tuir APFTL katak declaration for the future hanesan apelu ida atu harii mundu ida ne’ebe justu liu, pasifiku no sustentavel, no ba joven Timor-Leste ida ne’e laos deit vizaun ida maibe mos nesesidade ida ne’ebe urjente tamba moris iha nasaun ida ne’ebe riku ho kultura no historia maibe mos tenki konxiente konaba dezafiu sira ne’ebe sosiedade sira hasoru, husi kiak, dezempregu, asesu limitadu ba edukasaun no ba saude.
Nia mos espera katak “global digital impact” ne’e bele garante inkluizaun dijital ba ema hotu iha investementu infraestrutura dijital iha Timor-Leste, atu joven hotu-hotu bele asesu ba edukasaun ho kualidade, oportunidade empregu no servisu barak liu husi teknolojia no ikus liu bele iha protesaun ba direitus umanus iha espasu dijital atu garante teknolojia uja ba bem-komum.
“Ita joven Timor-Leste iha mehi boot konaba futuru ida ne’ebe ita bele kontribui tomak ba dezenvolvimentu ita nia rain, iha potensia boot ne’ebe ita presija apoiu husi ONU no komunidade internasional sira ne’ebe nesesariu hodi halo ita nia mehi sira sai realidade ho tulun no orientasaun, ita bele sai ajenge ba mudansa ne’ebe lori benefisiu boot ba sosiedade no ita nia planeta”, Zaulino konklui
Iha fatin hanesan Patricia Digiovanni hateten jovem laos deit futuru mais jovem nia papel mos importante iha momentu ida hanesan ne’e no eventu ida ne’e diak tebes atu nune bele hatene katak jovem bele ejerse duni nia papel iha era ida agora.
Patricia hateten tan katak foin sae sira iha maneira diferente no UN suporta ba agora dadauk maka kria espasu ba foin sae sira atu nune foinsae sira bele partisipa ativamente no laos deit sai benefisiariu, maibe sai mos lider ba sira nia malu jovem sira seluk iha area rural nomos iha fatin sira seluk.
“Hau nia mensagem ba jovem foin sae sira mak buka esperensia hodi hetan ba tamba nasaun ida ne ita boot sira nia tamba ne’e partisipa ba no foti oportunidade ida nebe mak iha atu nune bele kontribui ba imi nia sosiedade” hakotu nia.
