Home Saude Ema Hamutuk 252 Iha Aldeia Lecidere Simu Vasina AstraZeneca

Ema Hamutuk 252 Iha Aldeia Lecidere Simu Vasina AstraZeneca

316
0
Aldeia Lecidere, Suku Bidau Lecidere, Postu-Administrativu Nain Feto Munisipiu Dili. [Foto: Joselina | 31.05.2021]

Reportajen Joselina dos Santos

Komunidade hamutuk ema nain 252 simu ona Vasina AstraZeneca iha Aldeia Lecidere, Suku Bidau Lecidere, Postu-Administrativu Nain Feto Munisipiu Dili.

Komunidade Nelson da Silva dos Santos bainhira simu tiha Vasina AstraZeneca ba Neon Metin hateten nia Hakarak  simu Vasina AstraZaneca, tanba hakarak atu livre husi Moras COVID-19, ne’ebe fo ameasa ba mundu tomak, inklui mos rai doben Timor-Leste, no atu hadook-an husi pandemia COVID-19.

“Depois de ha’u simu Vasina AstraZaneca sente diak tanba laiha reasaun ruma, karik dalaruma orsida liu tiha horas tolu ho balun mak ha’u foin sente.  Ha’u simu Vasina AstraZaneca ho fuan laran atu nune’e moras ne’e labele hada’et ba ita”, dehan Nelson da Silva dos Santos ba Neon Metin iha Sede Suku Bidau Santana, 31/05.

Komunidade Natalicia do Rosario informa, nia hakarak simu Vasina AstraZeneca tanba importante tebes ba nia saude, no aumenta imunidade para moras COVID-19 ne’e labele fasil atu kona ema ka la hadae’t ba ema seluk,  tanba nu’udar sidadaun ida tenki kumpri regra Organizasaun Mundial Saude nian.

“Ha’u rasik mak fi’ar-an duni mai simu Vasina AstraZeneca,  tanba ne’e tuir ida-idak nia sentiment, karik ita hatene katak moras ne’e fo ameasa ba ita nia saude, di’ak liu kumpri regra husi Ministeriu Saude hodi simu Vasina AstraZeneca”, dehan Natalacia

Iha Fatin hanesan Infermeira Centru Saude Farmoza, Dilma S. B. A. Pereira dehan katak sira apresia tebes, tanba sira bele kontinua nafatin no susesu, tanba sira nia serbisu diak hamutuk ho autoridade lokal. Komunidade sira iha antusiasmu hodi mai simu vasina AstraZeneca

“Ha’u senti foun-foun ne’e komunidade tauk no lafiar-an atu simu Vasina AstraZaneca, maibe dadaun ne’e kuase ema hotu iha konsiensia rasik  no sira nain duni hakarak mai simu Vasina AstraZaneca,” dehan Dilma.

Iha sorin seluk Xefe Suku Bidau Lecidere, Luis Rebelo Soares Pereira hatete sira simu orientasaun husi Ministeriu Saude orienta katak atu simu vasina AstraZaneca ne’e la’os obrigatoriu, maibe depende ba ida-idak nia konsiensia atu simu Vasina AstraZaneca.

Nu’udar autoridade lokal husu komunidade sira labele rona lia falsu, di’ak liu hotu-hotu tenki iha konsiensia hodi simu Vasina AstraZeneca,tanba tanba Vasina  AstraZaneca nunka mais estraga ema nia saude, Vasina ne’e atu prevene ita nia-an no mos aumenta ita nia imunidade.

Komunidade hamutuk ema nain 252 mak simu ona Vasina AstraZeneca Iha Aldeia Lecidere, Suku Bidau Lecidere, Postu-Administrativu Nain Feto Munisipiu Dili.

Print Friendly, PDF & Email

LEAVE A REPLY

Please enter your comment!
Please enter your name here