Reportajen David da Costa Gusmao
Sekretariu Estadu Protesaun (SEPS) apoiu ekipamentu konstrusaun ba vitima inundasaun hamutuk uma kain 788 iha suku Comoro, postu administrativu Dom Aleixo, Munisupiu Dili.
Sekretariu Estadu Protesaun Sivil (SEPS), Joaquim Gusmão Martins informa katak apoiu ne’ebe governu oferese atu bele hakmaan netik komunidade afetadu sira nia sofrementu.
“Apoiu ne’ebe mak governu ka Sekretariu estadu fo ne’e atu bele hakman netik ita bo’ot sira nia sofrementu,no ohin ita mai iha suku Comoro, no ita simu dadus husi autoridade lokal no autoridade munisipui Dili nian, katak hamutuk uma kain 788 mak hetan estragus husi inundasaun foin lalais ne’e,” dehan Joaquim Gusmão iha sede suku komoro hafoin entrega ekipamentus konstrusaun ba komunidade sira, Segunda 31/05.
Nia haktuir dadus ne’ebe SEPS simu husi autoridade lokal hamutuk uma kain 788 mak afetadu ba inundasaun, ho kategoria hanesan hela fatin ka uma hetan estragus total hamutuk uma kain 533, estragus kamaan hamutuk 131 no a’at naton hamutuk 124.
Nia dehan, tuir pakote rekuperasaun husi SEPS nian, sira ne’ebe hetan uma estragus total sei hetan mos apoiu osan ho montante $368.00 kada uma kain ida, inklui ekipamentus konstrusaun.
Nune’e, vitima ne’ebe kategoria estragus naton no kamaan sei simu deit osan ho montante $150.00 kada komunidade afetadu no ekipamentus kontrusaun nian maibe la inklui semente.
Ekipamentus ne’ebe SEPS distribui mak hanesan kaleng tahan 50, sementi sakas 25, besi beton 8 mm 10 Barra, Besi 10mm 12 barra, pregu kalen 2kg, pregu 12cm 2kg, pregu 7cm 4kg no arame finu rolu 2.
Iha fatin hanesan komunidade afetadu hosi inundasaun, Venansio de Jesus agradese ba SEPS, maske Timor-Leste infrenta hela pandemia COVID-19 maibe governu nafatin esforsu hodi taun matan ba nia povu.
