Reportajen Joselina dos Santos
Komunidade Aldeia Onebu’u Suku Sagadate Posto-Administrativo Laga Município Baucau hamutuk uma kain 75 mak durante ne’e hola rasik fiu hodi dada ba sira nia uma. Komunidade sira dada ahi eletrisidade ba idak-idak nia uma hahú husi tinan 2021 no monta propagu komesa husi 2022, tanba ne’e sira sente la satisfas ho sira nia atividade, nune’e husu governu tau atensaun
Abel Pereira hatete hanesan komunidade buat ne’ebé sira prekupa mak ahi eletrisidade ne’ebé sira rasik mai ho inisiativa hodi tau osan hamutuk atu bele dada ahi mai ba komunidade nia uma ida-idak nia uma. Tanba eletrisidade iha momentu ne’e iha de’it estrada públiku la dada ba komunidade sira, entaun sira iha aldeia sagamata iha inisiativa tau hamutuk osan hodi bolu EDTL mai dada ba ida-idak nia uma.
“Momentu ne’e ami hetan fiu metru 30 de’it ba kada familia, maibé metru 30 ne’e ami dada husi estrada mai atu dada ba ida-idak nia uma no fiu ne’e ami dada rasik. Osan jeral nian kada uma kain tau osan 100 dólar no ami rasik mak sosa lori mai. Nune’e ami sente deskrimiasaun, tuir lolos governu mak tau matan kona-ba problema eletrisidade ne’e laos ami mak hola rasik fiu aat liu estadu mai tau fali prepagu ida ne’e mak ami komunidade la satisfas no diskrimasaun ba ami”, dehan, Abel Pereira iha aldeia Samagata Posto-Administrativo Laga Município Baucau, 10/08.
Xefe Aldeia One-Bu’u, Suco Sagadate Posto-Administrativo Laga Município Baucah, Lorenco Gusmão Pereira hatutan, hanesan autoridade hatene komunidade nia preokupasaun tanba ahi eletrisidade durante ne’e parte autoridade hato’o ona karta pedidu ba parte ministeriu dala 5 ona maibe laiha reponde husi parte kompetente. Nune’e nu’udar Xefe aldeia iha reponsabilidade ba komunidade nia preokupasaun no kolabora ho inan aman sira hodi halo kontribuisaun, kada uma kain ida kontribui $ 300 hodi sosa rasik fiu hodi dada ba komunidade sira nia uma.
“Fulan neen EDTL,E.P husi Postu laga mai monta prepagu maibe ha’u rasik mak impede tanba tuir lolos governu mak iha responsabilidade hodi tau matan ba problema ne’ebe povu hasoru, laos komunidade mak dada rasik depois sira mak monta prepagu. Nune’e husu governu kria kondisaun ba komunidade sira mak hanesan primeiru tenke dada fiu tanba durante ne’e komunidade hamutuk autoridade lokal hodi organiza rasik, tanba ne’e husu governu responde ba pedidiu eletrisidade ne’ebé durante ne’e ami hato’o”, dehan Xefi Aldeia One-Bu’u.