Reportajen Joselina dos Santos
Lamberto Gusmão Pereira (60), hela iha Aldeia One-Bu’u, Suco Sagadate, Postu-Administrativo Laga, Município Baucau, nu’udar aman la kolen no la sente moras, bainhira tein tua sabu, hodi selu oan nia eskola, responsabilidade ne’ebe nia leba, la halokon esperansa moris nian, hodi kontinua esforsu hodi sustenta nesesidade uma laran nian.
“Durante ne’e ami moris ho natar, maibe neik-neik natar mos la buras, bee irigasaun menus no karau mos mate hotu tan dut laiha. Entaun ha’u koko hahú ku’a fali tua iha ai-bubur laran, depois tabun hamutuk iha bidon ida nakonu mak foin tein, maibe prosesu tein ne’e mos la fasil tanba lori tempu naruk presiza ho pasiénsia mak bele hetan rezultadu”, dehan, Lamberto iha Aldeia One-Bu’u, Suco Sagadate, Postu-Administrativo Laga, Município Baucau, 10/10.
Nia konta, ho idade ne’ebé mais avansadu la halakon aman Lamberto nia espiritu hodi kontinua esforsu, kada loron nia ku’a nu’u hun haat ka lima lori oras rua ho balun, maibe dalaruma loron ida la to’o masa mida, nune’e presiza tau hamutuk iha bidon durante fulan ida mak tein, prosesu tein mak primeiru tau uluk kafé musan ba iha au laran depois ho tali metan mak tein.
“Bainhira tein no hetan nia rezutadu karik sai ona tua sabu, entan tau iha masa lori ba fan iha merkadu Baucau Vila, tua primeiru ka ulun agua kiik ida $2.50 no masa ida $25.00, maibe ba segundu ka terseiru nian ne’e masa ida $ 20. Hakarak atu faan iha uma maibe ema la hola entaun presiza buka dalan atu ema bele hola. Osan husi faan tua ne’e mak uza hodi selu oan nia eskola sosa hahan no halo uma maske ho distansia dook no estrada ladiak, maibe pasiensia nafain tanba hakarak loron ida labele kesi kabun hamlaha”, nia dehan.
Lamberto iha oan hamutuk na’in-hitu kompostu husi feto na’in lima, no mane na’in rua entre sira ne’e na’n ida mak eskola no konsege remata iha nivel sekundária, maibe sira seluk ne’e forma hotu familia, husi faan tua ne’e nia konsege selu oan nia eskola dadaun ne’e kontinua kursu fali iha Díli maibe atu kontinua ba Universidade mak labele tanba kondisaun ekonomia la to’o.
Moris ho kondisaun defisiensia ain no matan, lasai bareira ba Tomas Gusmão Pereira ho nia fen kaben Maria Gusmão Pereira hodi kontinua luta ba sira-nia moris no sai hanesan vida agrikutór hodi tulun malu iha situasaun ne’ebé de’it iha Aldeia One-Bu’u, Suco Sagadate, Postu-Administrativo Laga, Município Baucau.
“Ha’u sofre moras defisiensia ain komesa husi iha okupasaun Indonézia nia tempu, ha’u la senti kolen bainhira hala’o atividade agrikultór tanba moris mak hanesan ne’e ona, laiha ema ida mak ajuda ami nia atividade tanba ami na’in-rua hela mesak. Ha’u iha forsa hakarak halo servisu maibé impaktu mak ain ladún di’ak hodi lao distansia dook, uluk bee laiha ha’u rasik ho kondisaun difisiensia ain nafatin forsa hodi ba kuru bee, tanba ha’u nia fen moras defisiensia matan entaun nia labele lao tanba la haree rai no la hatene dalan”,
Nia dehan, maske ho kondisaun defisiensia ain maibé nafatin halo atividade hanesan ema normal la sente todan hodi tau matan ba nia fen ne’ebé ho kondisaun defisiensia matan, nu’udar laen iha responsabilidade atu ajuda no hala’o servisu uma laran hanesan tein,fase bikan, kuru bee halo to’os no natar.
“Servisu todan ne’ebé ha’u hasoru loron-loron mak kuru bee, tanba ho distansia dook tebes dalaruma kuru bee loron ida dala ida, maibé tenke deskansa dala rua ka tolu mak foin to’o uma. Ami iha oan feto rua maibé forma ona familia no hela dok husi ami, entaun tempu mak sira mai vizita ami, senti triste no terus tebes maibé ami nafatin forsa hodi hasoru situasaun moruk no midar hamutuk nunka fahe malu”,
Hanesan Laen tenke forsa hodi halo serbisu tanba laiha ema ida maka ajuda sira-nia serbisu kada loron tein kuru bee no fase bikan, bainhira sente kolen entaun sira selu ema mak ba kuru bee ho presu fó osan 1 dolar maka sira foin kuru bee lori mai hodi sira uza. Osan ne’e sira hetan husi faan tua nomos simu Terceira idade nian mak hola hahan masin mina no nesidade basika no balun rai.
Iha fatin hanesan Tomas Gusmão Pereira ho nia fen kaben Maria Gusmão Pereira sira-nia moris todan no terus tebes, tanba ho kondisaun ne’ebé defisiensia matan no ain, durante ne’e sira na’in-rua hela mesak lao labele tanba ho kondisaun ne’ebé defisil tebes.
Iha sorin seluk xefe aldeia One-Bu’u Suku Sagadate Lorenco Gusmão Pereira rekonese katan defisiensia entre fen laen ne’e merese estadu tau matan, nune’e nu’udar autoridade aldeia hatene sira-nia kondisaun maske moris difisiensia maibé sira mós hetan osan veteranu no hetan osan terseira idade.
“Hanesan sente triste mos ba problema ne’ebé sira-nain rua infrenta mak kru be ho distansia dook, ne’e duni ami sei esforsu no informa ona ba PNDS postu laga hodi fasilita torneira ba sira hodi asesu mos bee”
