Reportajen Silvino Freitas
Governu Japaun no Programa Ai-han Mundial (WFP) kontinua hametin programa merenda eskolar ba tinan 2026, nunee Japaun oferese osan $700,000 hodi fo dalan ba WFP suporta ministeriu administrasaun estatal no ministeriu edukasaun ho foos tonelada 330 neebe sei apoia aihan ba estudante liu 100,000 iha eskola liu 350, nunee ministeriu edukasaun agradese ba embaixada japaun tanba nafatin fo kontinuidade ba programa merenda eskolar neebe husi programa HATUTAN remata ona.
Embaixador Jepan iha Timor Leste Testsuya Kimura dehan, governu japaun fornese osan hamutuk $700,000 hodi apoiu merenda eskolar nian neebe hamutuk ho foos tonelada 330 hodi bele kobre ba labarik estudante sira hamutuk 100,000, nunee husi ajudu neebe governu japaun oferese nee atu bele hadia nutrisaun ba labarik sira iha eskola nunee sira bele aprende diak liu tan.
“700,000 sei fornese husi governu japaun ba programa merenda eskolar nian hamutuk ho foos tonelada 330 hodi hadia nutrisaun ba labarik sira iha eskola” dehan Embaixador Jepan iha Timor Leste Testsuya Kimura hafoin asina termu entrega iha Otel Timor, (20/11).
Embaixador Testsuya Kimura dehan tan, foos hirak nee sei fornese enerjia ba labarik sira nia kresimentu saudavel atu permiti prosperu akademiku ba sira, nunee mos iha japan merenda eskolar sai pillar importante ba estudante sira nunee fonesimentu foos sei haburas konesimentu alimentar neebe saudavel iha timor leste ba labarik sira hodi enrikese sira nia isin no hanoin, japaun nia apoiu laos deit husi foos maibe apoiu mos kultivasaun ba haree neebe halo ona iha munisipiu sira hanesan manatuto no bobonaro.
“japaun konsistente fo prioridade ba servisu hamutuk ho povu timor leste iha seitor edukasaun, ami harii ona eskola liu 40 iha area remota sira hodi garante katak labarik sira iha ambiente aprendijajen ho kualidade” nia dehan.
Fatin hanesan ministra edukasaun Dulce de Jesus dehan, programa merenda eskolar nee servisu hamutuk entre ministeriu edukasaun, ministeriu administrasaun estatal, ministeriu saude neebe dadaun nee sai tan sasin ba asina akordu entre governu japaun no WFP neebe apoiu aihan no osan ba programa merenda eskolar nunee foos neebe oferese nee atu uza konsumu ba loron 43 nunee iha fulan janeiru fevereiru ho marsu ba oin nee bele hetan ona foos nunee osan neebe governu tau bele sosa fali aihan seluk hodi kompleta menu aihan hodi reforsa aihan neebe nutritivu ba estudante sira.
“ba munisipiu aileu dili covalima ho lautem, uluk iha munisipiu 4 mos hetan apoiu husi programa HATUTAN mais HATUTAN hotu maibe ita hetan fali entaun ita agradese ba embaixada japaun kontinua apiu ba WFP nunee kontinua apoiu ba estudante sira iha timor leste programa merenda eskolar” dehan ME Dulce de Jesus.
