Reportajen Umbelina dos Reis
Asosiasaun Jornalista Timor Lorosa’e (AJTL), realiza Kongresu ba Dala V, ho tema “Respeita sala redasaun, respeita públiku no direitu ba informasaun”. Iha kongresu ne’e, Prezidente AJTL Zevonia Vieira enkoraja kongresista no membru sira, liu-liu feto sira hodi bele kandidata aan hodi lidera no kontinua misaun no vizaun AJTL nian iha futuru.
Prezidente AJTL, Zevonia Vieira, hateten, ohin no aban (24 no 25), AJTL realiza kongresu ba dala-V nian hodi hili nia Prezidente no estrutura foun, nune’e aban sei kontinua halo eleisaun ba periodu ba tinan 2024-2028 iha futuru. Nune’e loron primeiru diskusaun nakloke kona-ba asuntu importante tanba iha era agora luta ba Direitus Umanus ne’e sai hanesan prinsipiu fundamental ne’ebé AJTL kaer ona iha tinan 25 nia laran.
“Ohin diskusaun nakloke maibé foku liu ba fundador AJTL sira tau importansia ba liberdade imprensa no espresaun nomos fó solidaridade sai importante entre jornalista nasionál no rejional hasoru intimidasaun sira ne’ebé Jornalista sira hasoru. Nune’e membru AJTL tenki halo reflesaun ba jornalista sira mezmu la’os membru AJTL maibé hetan ameasa ka torturasaun ruma, entaun ita tenki hamriik hamutuk hodi luta ba sira nia direitu atu moris seguru. AJTL luta ba seguransa no kontinua luta ba liberdade imprensa hahu hosi sala redasaun, tanba Instituisaun balun influensia polítika iha sala redasaun”. Dehan Prezidente Asosiasaun Jornalista Timor Lorosa’e, Zevonia Vieira ba Jornalista sira, iha salaun CNE, Colmera, 24/08.
Membru AJTL total hamutuk 500 resin ne’ebé kompostu hosi media, jornalista, fotografer, designer, radio komunidade, Citizen Jornalist no estudante komunikasaun sosial. Nune’e importante ba AJTL mak hasa’e no promove sira nia kualidade hanesan jornalista nune’e bele kontinua promove no dezenvolve media iha Timor-Leste ho di’ak liu iha nivel internasional karik jornalista iha media Timor-Leste ne’e iha kapasidade no la diferente ho media internasional.
“AJTL mos agradese ba doador sira ne’ebé apoiu AJTL kuaze tinan haat nia laran hanesan UNESCO, UNDP, Asia Fundation, Oxfam, Embaxada Amerika iha Timor-Leste, no governu liuhosi Sekretariu Estadu Komunikasaun Sosiál (SECOMS), MAPCOMS, Aliansa Jornalis Independente hosi Indonesia no selu-seluk tan ne’ebé kontinua fó apoiu fundus ba AJTL hodi fó treinamentu oin-oin ba jornalista sira. Tanba jornalista sira ne’ebé hetan benefisiu hosi treinamentu oin-oin ne’e iha duni mudansa hanesan Chek fakta oinsá verifika informasaun, oinsá hakerek news ba jornalista investigativu, istoria konaba feto no fotografer.” Dehan Prezidente AJTL Zevonia Vieira.
Nia informa, AJTL iha komitmentu boot hodi kontinua luta ba lia-loos liuhosi reportajen ne’ebé fó sai, prinsipiu katak liberdade imprensa no espresaun ne’e la mout, tanba istoria susesu ne’ebé estrutura no membru AJTL halo iha tempu Covid-19 bainhira VIII governu konsege kria lei kriminaliza defamasaun AJTL ho nia aliadu, Direitus Umanus no ativista sira luta kontra ida ne’e to’o ohin loron. AJTL mos esforsu bainhira jornalista hetan ameasa ka notifikasaun hosi Instituisaun balun entaun ita tenki aproxima sira katak ita boot sira tenki respeita liberdade imprensa papel jornalista nian.