Reportajen Umbelina dos Reis
Vizita istóriku Papa Francisco ohin, loron 9 fulan Setembru 2024, iha rai doben Timor. Vizita Sua Santidade Papa Fransisco iha Timor-Leste ne’e, joven foinsa’e sira husu ba Papa husik hela mensajen ba kristaun relijiozu tomak hodi hametin fé no esperansa iha Relijiaun Katólika. Husu mos ba Amo Papa husik hela mensajen ba líder ukun-na’in hodi hametin sira nia fiar, fo liman ba malu atu harii dame nune’e ukun povu iha domin nia laran.
Zelia Soares hateten, Amo papa nia vizita mai Timor-Leste ne’e sei fó benifisiu pozitivu ba relijiozu tomak iha mundu, inklui nasaun Timor-Leste, basá Papa Fransisco mak sai ulun boot ba kreda Katólika. Nune’e mos ho vizita papa Fransisco mai Timor-Leste ne’e sei hametin liu tan fé espiritual Timor-Leste nian, no sei hakle’an liutan sarani sira-nia fiar iha kristu.
“Vizita Papa Fransisco mai Timor-Leste mai ha’u pesoalmente signifikante tebe-tebes, tamba nu’udar sarani ida ne’ebé fiar metin iha Kristu hasoru direita ho ulun boot Kreda Katólika nian iha mundu ne’e, sente kontente tebe-tebes Amo Papa nia prezensa iha Timor-Leste.” Dehan Zelia Soares, ba Neon Metin, iha Becora, Segunda-feira, 09/09.
Nia dehan, nia esperansa boot ida katak papa Fransisco sei husik hela nia mensajen murak ba ita Timor oan hotu, nune’e bele hametin liu tan ita-nia fiar, pas, dame no domin mai iha ita-nia nasaun.
Estela Bendita da Costa hateten, bainhira Amo Papa Francisco vizita mai Timor-Leste, iha nia vizita bele fó impaktu boot ba vida relijioza no espirituál Timor-Leste nian tanba Amo Papa nu’udar lider espirituál boot ba sarani Katóliku sira iha mundu tomak no liu hosi nia prezensa fo mensajen ne’ebé bele enkoraja no hametin sarani katóliku nia fiar iha kristu.
“Bainhira Amu Papa Francisco vizita mai Timor-Leste, pesoalmente nu’udar timoroan, ha’u sente orgullu tebes ho Amu papa nia prezensa tanba Amo Papa hanesan líder espirituál boot ida ba relijiaun Katólika iha mundu tomak bele halo vizita mai rai doben Timor-Leste ne’ebé ho populasaun maioria ho relijiaun Katóliku, ne’e sente haksolok tebes tanba Amo Papa sei halo kontaktu ho povu Timor-Leste no bele ko’alia ho ita-nia lideransa sira. Ida ne’e bele hametin relasaun entre Timor-Leste no Vatikanu.” Dehan Joven foinsa’e Estela.
Nia dehan, nu’udar joven foinsa’e hakarak husu ba amo papa husik hela mensajen ba nasaun Timor-Leste inklui líder katóliku sira konaba dame no rekonsiliasaun Timor-Leste nian, ne’ebé seidauk rekupera hosi konflitu no trauma iha nia istória pasadu, mensajen konaba dame no rekonsiliasaun ne’e sente importante tebes ba povun ki’ik no ba ema vulnerável sira iha nasaun Timor-Leste. espera iha futuru atu fó inspirasaun ba povu Timor-Leste atu kontinua luta no dezenvolve nasaun nian, liu-liu iha área sosiál, ekonomia no polítika, no husik hela mensajen fiar no fidelidade ba Kristu atu haforsa no hametin fiar Kristaun, tanba nasaun Timor-Leste nu’udar nasaun Kristaun ida.
Nune’e, Ivo Cavaco Fernandes dehan, nu’udar ema katolika sente orgullu no agradese tebes ba vizita Amo Papa iha Timor-Leste tanba liuhosi vizita ida ne’e bele hametin liu tan ita sarani Katólika sira-nia fiar iha vida relijioza nune’e bele lori pas, dame no domin hakmatek mai ita nia rai doben Timor-Leste.
“Ha’u nu’udar sarani katóliku sente orgullu no kontente tebe-tebes tanba liuhusi vizita sua santidase nian, ida ne’e foin primeira vez mai vizita, ne’e hanesan grasa ida mai ita sarani katóliku iha Timor-Leste.” Nia dehan.
“Husu ba Amo Papa fó hela mensajen murak ida mai ita nia rai doben Timor-Leste, nune’e sarani katóliku sira hotu bele fiar metin. Nune’e mos fó mensajen murak hela ba líder sira, hodi bele fo liman ba malu, nune’e bele ukun povu no nasaun Timor-Leste ho onestidade.”