Reportajen Umbelina dos Reis
Relasiona ho komunidade iha rai ketan Naktuka, ne’ebé la asessu ba bee-moos, no sira uza deit bee posu ne’ebe sira kee rasik, maske la dun moos, maibe komunidade sira hodi ba nesesidade lor-loron nian.
Ba preokupasaun ne’e, Neon Metin halo konfirmasaun ho Vise Prezidente Bee Timor-Leste (BTL), Zeca Smith, ba Neon Metin, Vise BTL hateten komunidade iha área Naktuka la asesu ba bee mos ne’e la’os BTL nia kompeténsia, tanba rejiaun Administrativu Espesiál Oe-cuse Ambeno (RAEOA), ne’e rejiaun ketak maibé nafatin iha liña koordenasaun.
“BTL laiha kompeténsia konaba bee-moos iha área Naktuka, maibé sira husu liña koordenasaun ita bele ajuda no fó apoiu.” dehan vise prezidente BTL Zeca Smith ba Neon Metin, iha salaun FOKUPERS, Farol, segunda-feira, 11/11.
Nia dehan, dala-ruma ita identifika iha fatin balun, populasaun balun laiha konxiénsia konaba utiliza bee, maibé sira uza haluha tiha sira nia maluk sorin mos presiza hela bee.
“Dala-ruma bee sai hela, liga iha sira nia uma oin, maibé komunidade balun uza tiha sanyo, entaun seluk la hetan bee, nune’e ita populasaun mak tenke utiliza bee ho konxiénsia.” Nia dehan
Nune’e informa ba públiku katak karik bee iha ona tenke uza ho kuida no koopera di’ak ho ajénsia, parseiru no ONG sira nune’e bele tau matan ba bee ho di’ak, tanba bee mos ne’e ita hotu nia responsabilidade. Bee moos ne’e importante ba ema hotu nune’e nu’udar Timoroan tenke iha responsabilidade ba ambiente no rekursu bee nian, tanba bee mak fatór importante ba ema no balada sira hotu, tanba realidade iha kapital Dili bee-moos sei iha problema boot ba komunidade.