Reportajen Joselina dos Santos
Asosiasaun Jornalista Timor Lorosa’e (AJTL), fasilita treinamentu kona-ba “Direitu Umanus no Jornalizmu” ba editor/a media hodi kapasita sira-nia koñesimentu, oinsá atu akompaña jornalista sira hodi halo kobertura ba asuntu hotu-hotu liga ho perspetiva direitu umanus.
Iha treinamentu ne’e, Prezidente AJTL Zevonia Vieira husu ba editor media sira atu bele kolabora diak ho treinadór/a sira hodi aprende kona-ba direitu umanus. Tanba AJTL nia misaun boot ida mak atu luta ba liberdade imprensa no liberdade expresaun nomós ba parte direitu umanus nian.Treinamentu ne’e importante tebes atu kapasidade editor media sira tanba sira iha responsabilidade ba jornalista sira atu bele hakerek asuntu sosial ne’ebé mai ho perspetiva direitu umanus.
“Ita hakarak jornalista sira kobertura kona-ba isu-isu ne’ebé dadaun ne’e akontese liga ho feto ema ho defisiénsia, labarik no relijiaun oinsá mak jornalista no editor media sira bele hakerek ho perspetiva direitu umanus. Nune’e media sira bainhira edit notísia video no radio presiza mai ho perspetiva direitu umanus liga ho ema nia direitu ba moris ho asuntu oin-oin”, dehan, Prezidente AJTL iha Salaun Radio Liberdade Hudi-Laran, 17/01.
Prezidente Informa, karik jornalista sira hakerek notísia laiha perspetiva kona-ba direitu umanus, entaun editor sira presiza fó atensaun ba jornalista sira atu promove direitu umanus iha sira-nia kobertura. Importante tebes liu-liu kona-ba protesaun labarik liga ho eviksaun ne’ebé dadaun ne’e akontese oinsá mak sira bele foti liuhosi konvensaun direitu labarik nomós liuhosi papel governu nian oinsá atu halo protesaun ba labarik sira.
Iha fatin hanesan, Fasilitadór Scos Vieira hatutan, direitu umanus nu’udar direitu fundamental no universál ne’ebé pertense ba ema hotu, la haree ba rasa jeneru, nasionalidade, etnia relijiaun no ema ho kondisaun saida deit. Entaun jornalista iha liberdade tomak atu halo kobertura ba informasaun hotu-hotu maibe tenke kumpri kódigu étika jornalístika no lei komunikasaun sosial nomós respeita ema nia privasidade.
Programa ne’e realiza tanba iha kolaborasaun no hetan apoiu fundus husi The Asia Foundation