Reportajen Joselina dos Santos no Joanina Casamiro
Nesesidade obriga Fernando Gomes da Costa do Nascimento idade 35 husik nia Município Bobonaro hakat mai iha Postu-Administrativo Quelicai Município Baucau, hodi buka moris hanesan negosiante lao rai hodi hetan osan atu tau matan ba nia familia uma laran. Nune’e husu ba joven sira katak moris ne’e tenke depende ba a’an rasik, kualker saida halo de’it importante familia kontente duke sai naok-ten hodi hamoe familia nomos jerasaun sira iha futuru.
“Ha’u fa’an sasan ne’e kuaze fulan 5 atu ba fulan 6 ona, tanba moris tenke obriga hodi la’o haleu Munisipiu no postu hodi buka osan atu hetan netik $ 1 ka $2 hodi sustenta ba familia uma laran. Ami kost iha Postu-Administrativo Quelicai Vila kada fulan selu 35, hahú fa’an iha 2024 to’o agora, hau fa’an ne’e depende ba komunidade nia hameno no faan tuir sasan ne’ebé kominidade sira hakarak atu sira bele sosa”, dehan, Fernando ba Neon Metin iha Posto-Administrativo Quelicai Município Baucau, 8/03.
Nia dehan, iha ne’e hamutuk ema na’in 8 mak kost hodi buka moris maioria mai husi Munisipiu Bobonaro maibe suku mak la hanesan. Konsekuénsia atu ema hola ka la hola ne’e tenke simu realidade tanba moris mak nune’e, atu buka servisu mos susar entaun maluk balun ladun bok aan ne’e barak mak sei sai naok-ten tanba lakoi esforsu aan hodi buka moris.
“Lalin sasan haleu husi postu ida ba postu seluk ne’e todan, no kolen ka la kolen ba ha’u agradese mesmu todan maibe ha’u tenke esforsu no la bele baruk no laran metin ba ema seluk, halo saida deit mak hetan osan ha’u prontu atu halo naran katak ha’u nia fen ha’u nia oan ha’u nia familia kontente. Ha’u iha oan nain ha’at (4), Mane nain 3 feto nain 1, sira nain ha’at ne’e, rua mak eskola rua seidauk eskola tanba sei ki’ik hela ne’eduni esforsu ne’e ba sira”, nia dehan.
Durante haleu Munisipiu hodi buka moris ne’e laiha problema ruma, dalaruma mos sira hanoin tanba ema barak mak buka moris hanesan fila liman nune’e ema komprende. Sasan sira ne’e fa’an depende ba ema sosa, loron ida karik ema hola bele hetan $40 hanesan ne’e nia funan loron ida bele hetan $11 ka $10 sente kontente tanba hetan netik hahan, hemu ka sosa netik sigaru ruma, lori netik uituan ba fen no oan sira atu uza.
“Sasan sira ne’e ami sosa husi Dili mak lori mai fa’an iha ne’e, Sasan sira ne’ebe ami fa’an depende ba ema hameno mak ami lori mai hanesan Kadera, Meza no sasan seluk. Sasan hirak ne’e atu todan ka la todan mos tenke buka meius oinsá atu hetan dalan no ita la bele sai hanesan ema seluk nia a’an maibe sai mai ita nia a’an rasik,”