Reportajen David da Costa
Conselho de Imprensa (KI) Timor-Leste liuhusi Diresaun Analiza no Dezenvolvimentu Mídia (DADM), halo Treinamentu Jornalizmu Ambientál ba jornalista sira husi media nasionál, no radio komunidade sira iha Lospalos. Jornalizmu Ambientál ne’e importante tebes, tanba iha ligasaun ho asuntu mudansa klimátika, poluisaun, bio diversidade no konservasaun ambiente.
Objetivu prinsipál husi treinamentu ida-ne’e mak atu hametin abilidade no koñesimentu Jornalista sira nian, oinsá atu halo kobertura ba problema ka krize ambientál hodi publika, nune’e komunidade sira bele konxiente atu hadomi no prezerva sira nia ambiente.
Tanba ne’e, Treinamentu ida ne’e nesesáriu tebes ba jornalista sira, tanba dadauk ne’e problema ambiental sira, hanesan mudansa klimátika, poluisaun, sunu rai arbisu no taa ai-laran sira afeta negativamente ba komunidade nia moris no biodiversidade sira. Entaun, treinamentu jornalizmu ambientál konsidera nu’udar mekanizmu própriu seluk atu proteje no salva planeta rai (the plant earth).
Diretor Ezekutivu Konselho Imprensa (KI) Timor-Leste, Antonio Dias, hateten, importánsia husi meiu ambiente, meiu ambiente ne’e ema estraga ne’e lalais, maibé atu rekopera ne’e kleur no difisil loos, presiza jerasaun, tanba ne’e jerasaun ida agora ne’e tenke salba meiu ambiente ba jerasaun ida ne’ebe mai. Tanba ne’e lori jornalista sira mai iha Lautem, atu hamutuk hodi haree no koalia kona-ba futuru ambiente nia.
“Tanba ne’e jerasaun ida agora ne’e ita boot sira tenke salba jerasaun ne’ebe mai, Tanba ne’e maka ita bolu jornalizmu ambientál. Ita mai iha ne’e, ita atu hamutuk hodi haree no koalia kona-ba futuru ambiente nian, ita hatene Lospalos iha ai-laran tuan ne’ebe barak ne’ebe kontribui ba ita nia jerasaun tuir mai, se ita nia meiu ambiente ne’e estraga hotu, ita labele koalia kona-ba politika, ekonomia, edukasaun, saúde tanba laiha fatin ita atu moris. Entaun formasaun ida ne’e, saida maka konselho Imprensa hein husi ita boot sira katak ita bo’ot sira mak sai pro sustentablidade ba Ambiental, ita boot sira tulun Timor ne’e, atu bele salva ita nia meiu ambiente no jerasaun tuir mai bele goja meiu ambiente,” Dehan Director Ezekutivo Conselho lmprensa Timor-Leste, iha salaun Hotel Roberto Carlos Munisipio Lautem 23/05.
Diretor Diresaun Analiza no Dezenvolvimentu Mídia, Alberico da Costa Junior mos hateten, atividade ida ne’e asaun estratéjiku ida husi Conselho lmprensa nian, atu hametin kompetensia profisionál Jornalista nian, oinsa kontribui ba objetivu jerál, ne’ebe Conselho lmprensa iha no oinsa atu garante independencia jornalizmu iha kada redasaun media ninian, entaun treinamento ida ohin ne’e atu atinje Conselho lmprensa ninia planu asaun, prinsipal loloos ba Jornalista Ambiental.
“Entaun ita nia jornalizmu ne’e mai ho paradignu ida foun oinsa ita responde ho efetivo barak liu, ita nia notisia mai ho ekonomia, politiku barak liu ho sosiadade no crime, mais asuntu Ambiental ne’e presiza paradignu ba Jornalizmu ida foun tanba ne’e mak ita bolu jornalismu Ambiental,” dehan Alberico.
Nune’e mós Jornalista husi Media Mudansa, Sandi Belo, Agradese ba Conselho Imprensa ne’ebé mak realiza atividade treinamentu jornalizmu Ambiental ba jornalista sira, pesoal orgulho tebes bele partisipa iha treinamentu ne’e tanba bele kapasita no aumenta koñesementu kona-ba jornalizmu ambiental nian.
“Tanba ne’e, Treinamentu ida ne’e fasilita tebes ami jornalista sira atu halo kobertura ne’ebé mak klean liu ba iha Ambiente nian,” Nia dehan
Nune’e mós, nia husu ba KI atu treinamentu ida ne’e labele to’o de’it iha ne’e tenki kontinua ho treinamentu sira hanesan ne’e atu nune’e jornalista sira mós iha koñesementu ne’ebé naton ba iha area jornalizmu Ambiental nian.
Entretantu tuir treinamentu kona-ba jornalizmu ambientál iha Lautem ne’e, Jornalista hamutuk nain-14, nain-7 husi Média nasional maka hasesan media online Neon-Metin, STL News, Lafaek News, Media Mudansa, Hatutan.com no Nain-7 husi Radiu komunidade Lautem.