Banku Dezenvolvimentu Asia anunsia ohin anunsia komitmentu tau bilaun $40 to’o 2030 hodi responde ba krizi ai-han iha rejiaun Asia hodi hadiak liutan seguransa aihan, nutrisaun no hametin sistema ai-han hodi hasoru impaktu hosi mudansa klimatika.
“Situasaun ne’ebe la presedente hanesan bailoron naruk, be-sae, manas maka’as, no degradasaun meioambiente mak sai tiha ona dezafiu ba produsaun agrikula, iha tempu hanesan ameasa mos seguransa ai-han moris iha rurais nian,” Presidente ADB, Masato Kanda hato’o iha Enkontru Annual ADB nian ba dala-58 iha Milan, Italia
Ambisaun foun ida ne’e dezenvolve hosi kumprimisiu ADB nian iha Setembru 2022 atu investe bilaun $14 iha 2025 hodi hadiak seguransa aihan no halo kman krizi aihan iha rejiaun asia. To’o iha 2024, ADB halo tiha ona nia komitmentu bilaun $11 – aumenta 80% hosi alokasaun orijinal nian ho investementu adisional biliaun $3.3 ne’ebe programadu ba 2025.
Biliaun $26 nudar fundu adisional ne’ebe anunsiu ohin sei konsisti hosi bilaun $18.5 hosi ADB nia suporta direta ba governo no bilaun $7.5 ba investementu setor privadu nian. To’o 2030, ADB iha objetivu atu setor privadu mak reprezenta 27% hosi programa sira ba total bilaun $40 nian, ho konsiderasaun ba papel kritiku setor privadu nian hodi dudu transformasaun sistema ai-han.
Peritu Sektoral ADB, Diretor Agrikultura, Aihan, Natureza no Dezenvolvimentu Rural nian, Qingfeng Zhang hato’o katak, “iha sudeste asiatiku programa ne’ebe sai prioridade mak responde ba dezastre no harii infrasestrutura sistema ai-han ba tempu naruk nian”.
Rejiaun sudeste asiatika iha tinan 3 liuba hasoru problema dezastre naturais oioin, hanesan akontese iha Thailandia, Filipina, Indonesia, Timor-Leste.
Timor-Leste nudar nasaun illa ho ninia dezenvolvimentu ne’ebe sei frajil hela no ADB sei konsidera nafatin nudar nasaun pos-konflitu nian, kontinua hasoru dezafiu oioin relasiona ho mudansa klimatiku ne’ebe fo impaktu bo’ot ba seguransa ai-han. Produsaun agrikula ki’ik liu nasaun illa sira seluk ho 36% populasaun mak hasoru inseguransa ai-han tinan-tinan no hetan index 110 nudar rai hamlaha entre rai 121 tuir Index Global Hunger 2022 nian. Populasaun pursentu 30.6 mak iha situasaun seriu hasoru hamlaha.
Bilaun $40 ne’ebe ADB promete tau ba apoio dezenvolvimentu agrikultura, meioambiente no rekursu naturais, infraestrutura ba sistema aihan nian, asistensia sosial, inklui responde ba emerjensia, no mos nutrisaun no saude.