Reportajen Silvino Freitas
Eis Primeiru Ministro no atuál Sekretáriu Jerál partido Frente Revolusionariu Timor Leste Independente (FRETILIN) Marí Alkatiri konsidera, seitor saúde laiha progresu di’ak tanba laiha jestaun di’ak ba rekursu sira, ne’ebé nia prepara iha primeiru governu ne’ebé nia rasik lidera nu’udar primeiru ministro, tanba altura ne’eba konsege halo kooperasaun ho Cuba hodi halo formasaun ba mediku sira no to’o dadaun ne’e mediku 1300 maibé laiha jestaun di’ak iha seitor saúde mak seitor saúde laiha progressu ne’ebé di’ak.
Sekretáriu Jerál FRETILIN Marí Alkatiri dehan, esforsu ne’ebé primeiru governu hala’o iha area saúde nian ne’ebé hahú ho kooperasaun ho Cuba haruka timoroan ba estuda medisina iha Cuba to’o dadaun ne’e iha ona 1300 mediku maibé seitor saúde laiha progressu nune’e tenke hatene kauza ne’e mai husi ne’ebé.
“Uluk iha mediku 100 resin konsege halo ona polítika formasaun ba mediku barbarak, agora iha ona 1300 atu jere de’it mós la hetan, tanba saida ministra maka laiha kompeténsia ka, ka governu” dehan Sekretáriu Jerál FRETILIN Marí Alkatiri liu husi konferénsia imprensa ne’ebé hala’o gabinete eis primeiru ministero Faról, (21/05).
Nia dehan tan, iha primeiru governu ne’ebé nia rasik lidera tau prioridade makaas ba seitor edukasaun ho orsamentu 20% no segundu prioridade maka seitor saúde, altura ne’e nasoens unidas husu atu entrega seitor saúde ba NGO internasional sira maibé nia rasik mak lakohi atu governu ne’ebé nia raisk lidera mak kontrola seitor saúde nune’e sira kontrola duni, iha prioridade ne’e konsege halo kooperasaun ho nasaun Cuba hodi halo formasaun ba mediku nune’e rezultadu mak dadaun ne’e iha ona 1300 mediku.
“Simeira iha Malaya ha’u la ba maibé prezidente mak ba no governu reprezenta husi Ramos Horta no ha’u husu atu tenta ko’alia ho komadante Fidel Castro atu difini kooperasaun ho governu Cuba, ida ne’e de’it restu ne’e ha’u mak halo ha’u maka ba to’o Cuba, iha museum ida iha Cuba sira iha dadus ida líder international ne’ebé hasoru malu ho Fidel Castro tempu naruk mak ha’u mesak 13 óras laiha tan ema ida” dehan Sekjen Marí Alkatiri.
Nia konklui katak, husi enkontru ne’ebé nia halo ho Fidel Castro ninia rezultadu mak 1300 mediku nune’e iha ninia misaun hanesan primeiru ministru servisu ba rezultadu maibé progressu iha seitor saúde laiha nafatin, nune’e mós nia konsidera orsamentu jerál estadu ne’ebé aprova kada tinan to’o dadaun ne’e seida’uk iha balansu entre despeza ho rezultadu.