Reportajen Juvinal Cabral
“Ha’u nu’udar veteranu hato’o obrigado no parabens ba loron restaurasaun indepedensia 20 de Maio ne’ebe Timor-Leste selebra ba dala 23,” Veteranu Pedro Cabral ‘Maquino’ hato’o iha nia rezidensia Abo-Lir, Postu-Administrativu Matebian, Munisipiu Baukau, Segunda 19/05.
Veteranos “Maquino” enkoraja juventude sira no povu Timor tomak ba komemorasun loron restaurasaun indepedensia 20 de Maio ba dala 23, ukun an tinan ne’ebe naruk tebe-tebes nune’e nia husu ba juventude banati tuir veteranus, inan, aman no avo sira nia luta durante 24 anos iha ai-laran terus no sofre hahan la iha, la’os hanesan agora.
“Uluk ami iha ai-laran terus sofre ke’e kumbili mak ami foin han, ku’u koto moruk no buat oioin ne’ebe ami terus ba ukun rasik an durante 24 anos hasoru forsa Indonezia, ne’e mak ha’u husu juventude sira banti tuir ami halo sakrifisiu iha ai-laran.”
Veteranos ne’e husu joven sira kria nafatin estabilidade iha nasaun Timor-Leste, tanba sira nia terus ne’e uluk kuaze 500 anos Portogues sira hanehan povu Timor-Leste nune’e mak sira hakarak luta funu hasoru okupasaun Indonezia atu labele hanehan dala ida tan povu ida ne’e.
“Ne’e mak ha’u husu juventude sira labele halo brutal, labele halo krime no buat oioin maibe banati tuir uluk ami imi nia inan aman”
Veteranos ne’e esplika restaura 23 anos ona maibe povu Timor-Leste sei iha terus no sofre nia laran, produsaun menus dezenvolvimentu balun ba oin no balun hakdasak suku balun estrada seidauk di’ak uma ba populasaun seidauk di’ak moris ki’ak ho kondisaun at nia laran.
“Ha’u nia rekomendasaun ba nain governu sira bele tau matan, labele tur iha ne’eba mak manan osan ne’e deskulpa mais ha’u hateten hanesan ne’e. Tanba uluk funu kuandu ami hahu funu la’os promete ba ami veteranu sira atu manan osan ami oferese an ami nia maluk barak mate”.
Veteranos ‘Maquino’ ne’e husu ba governu atu tau matan nafatin ba povu nia terus no susar, liu-liu ministeiru edukasaun tanba nia hanesan veteranos ida hanorin iha eskola EBF Abo-Lir sala rua hamutuk de’it mak nia hanorin.
Nia preukupa profesores la iha ensinu apredisagem la iha kualidade, nune’e husu eduksaun atu haree eskola sira profesores la iha tenke koloka hodi hanorin estudante ho di’ak tanba sira mak futuru ba nasaun ne’e.
“Kona ba saude iha area rural liu-liu ami iha matebian hun Abo-Lir ami iha ne’e ba Quelicai dook liu lao kuaze kilometru 4 mak to’o iha hospital. Ha’u husu governu liu-liu ministeiru saude tau netik klinika ruma iha ami nia area ida ne’e para ami ferik katuas moras no inan isin rua sira labele lao dook maibe asesu besik.”
