Reportajen: Umbelina dos Reis
Relasiona ho konflitus ne’ebé foin dau-dauk akontese iha Bidau toko baru II, Postu Administrativu Cristu Rei, Komandu Polisia Nasional Timor-Leste (PNTL hamutuk ho autoridade postu administrativu Cristu rei, lider komunitaria, Organizasaun Nau- Governamental (NGO), komunidade no foinsa’e sira realiza dialogu atu hametin pas no dame tamba hela deit loron hira nasaun sira CPLP sei partesipa iha jogu ne’ebe maka Timor-Leste sai uma na’in ba jogu refere.
Komandante Eskuadra postu administrativu Cristu rei, Inspetór Xefe Polísia Paulino de Carvalho, liuhosi Dialogo hatete, ohin loron mai realiza Dialogo hamutuk ho lider komunitaria sira iha komandu Polisia Nasional Timor-Leste (PNTL), eskuadra Becora, oinsá atu buka hatene konaba konflitus ne’ebé akontese bei-beik iha suku refere.
“Konflitus ne’ebé akontese bei-beik iha aldeia toko Baru II ne’eba ne’e problema kiik-oan mosu hosi umane mane foun, maibé imi foinsa’e nia arogansia lakoi resolve. Nune’e komunidade ne’ebe hela besik estrada ibun mak sai vitima, uma rahun no balun kanek,”dehan Inspetur xefe Polisia eskuadra postu administrativu Cristu rei asistente Paulino de Carvalho, iha Becora Kuarta 16/07.
Tanba ne’e, husu ba foinsa’e sira iha Bidau toko baru II, hakmatek iha fatin hodi responde ba konflitus ne’ebé akontese foin dau-dauk loron hira liu ba ne’e, se lakohi responsabilidade mak sei husu ba autoridade suku tolu hodi bolu no fo lei hodi suplementa katak tanba saida mak autoridade seguransa bolu la mai. Tanba hela loron hira de’it ona nasaun viziñu Comunidade dos paises da lingua portuguesa (CPLP), sei mai partesipa iha jogu ne’ebe mak Timor-Leste sai uma na’in ba jogu refere.
“Hela loron hirak nasaun viziñu sei mai realiza eventu desportiva iha ita nia nasaun. Nune’e husu ba joven sira hatudu atitude di’ak, tanba ita mak sai uma na’in ba eventu refere,” Nia husu ba Joven sira.
Diretor Ezekutivu AJAR, José Luis De Oliveira hateten, Hakarak husu ba foinsa’e sira tenki hadomi Timor tanba rai ne’e mak fo moris ba ema hotu, Tanba Timor hetan independensia 25 anus ona, maibé injustisa sei iha.
Tanba dala-barak konflitus mosu hahu hosi foinsa’e sira, maibé konflitus mosu tanba iha buat fukun ruma nune’e ohin ema hotu tur hamutuk halo dialogu nune’e bele buka solusaun ba problema sira ne’e.
“Mezmu ita iha konflitus barak maibé importante mak ita tenki tau aas dignidade nasaun nian, se agora ita kontinua problema kiik-oan sira ne’e no la valoriza ita nia nasaun nafatin iha runbu-ranga nia laran, entaun ita desvaloriza luta sira ne’ebé uluk ita duni bapa sira sai hosi Timor-Leste.” Dehan, Jose Luis Oliveira.
Nune’e nasaun Timor-Leste tinan 25 anus independensia ona presiza lori Timor ba oin, mezmu konflitu violensia sei iha, maibé nu’udar foinsa’e Timor oan tur hamutuk hodi resolve ho ulun malirin, mezmu injustisa no diskriminasaun sei iha maibé buat sira ne’e mak hun. Nune’e husu ba foinsa’e sira presiza hari’i pasensia no dame ba malu.
“Eventu ne’ebé besik dau-dauk ona mai ne’e importante tebe-tebes, atu hatudu ita nia imajen perante ba mundu internasional katak Timor-Leste mak sai uma na’in di’ak, nune’e bainaka sira hosi estranjeiru mai Timor tuir eventu refere sente seguru no konfortavel,” nia subliña.
