Reportajen Silvino Freitas
Xefe aldeia Harame suku Aidabaleten postu administrativu Atabae preokupa ho komunidade aldeia Harame ne’ebé kompostu husi bairo 3 ho total kain 30 resin ne’ebé infrenta problema estrada no iha tempu bailoron susar atu asesu ba bee moos, tanba komunidade iha bee matan ida de’it no komunidade sira tenke lao dook ho kilometru ida resik hafoin hetan bee moos.
Xefe aldeia Harame Cristino Maudasi dehan, too dadaun ne’e komunidade iha aldeia Harame sei iha preokupasaun ba bee moos, estrada nune’e uluk populasaun seida’uk aumenta bee sufisiente maibé tanba numeiru populasaun ne’e aumenta halo komunidade mós susar atu asesu bee mos ne’ebé di’ak, komunidade iha nia aldeia susar atu asesu ba bee moos tanba bee ho distánsia ne’ebé dook no atu dada besik ba komunidade mos tenke liuhusi sistema bomba antes nee komunidade sira uza solar panel ne’ebé hetan tulun husi USAID hodi komunidade iha aldeia Harame uza maibé too dadaun ne’e solar panel ne’e avaria tiha ona no laiha osan ba manutensaun.
“Listrik tama ami dada fali ho listrik maibe la kleur bomba avaria tiha, no husi EDTL mos lori prepagu mai monta iha bee matan entaun komunidade hasoru fali problema foun maka sosa pulsa, depende mos ba bomba kiik uza pulsa uituan no boot uza pulsa barak” dehan sefi aldeia Harame Cristino ba jornalista iha aldeia Harame suku Aidabaleten, (06/09).
Nia dehan tan, bee matan ne’ebé atu komunidade asesu mos susar tanba ne’e komunidade la’o mos distánsia kilometru ida resin komunidade sira ne’ebé iha forsa sira bele lao hodi kuru uza gerobak maibé karik laiha forsa hanesan idozu entaun susar atu sira asesu bee mos, nunee iha sira nia aldeia iha bee matan ida de’it nebé sira uza iha tempu bailoron no seluk ne’e iha maibé tempu udan maka barak tempu bailoron bee laiha ona, iha tinan 2004 NGO balun mai instala solar panel iha bee matan sira uza maibé iha tinan 2015 eletrisidade tama 2017 sira uza fali bomba hodi komunidade iha aldeia Harame iha bairo 3 ne’ebé bele uza bee refere.
“Komunidade iha ne’e uma kain 30 resin maibé kada uma iha xede família 3 too 4” dehan sefi aldeia Harame.
Entretantu komunidade Alexandrina das Dores dehan, problema ne’ebé sira hasoru liuliu mak bee moos tanba sira lao dook atu asesu ba bee moos hodi uza ba nesesidade lorloron nian hanesan tein fase ropa no seluk tan.
“Ami kuru bee nee ba bee matan Behau dook lao kilo ida resin, ami feto sira lao kolen tanba dook no todan” dehan komunidade Alexandrina iha nia hela fatin aldeia Harame suku Aidabaleten.
Nia konklui, kuandu iha tempu atu hetan bee moos sira tenke la’o dook bee matan no sira tulun husi sira nia katuas oan sira ne’ebé sira lao dook uza karosa bainhira kuru.