Reportajen David da Costa
Primeiru Ministru (PM), Kay Rala Xanana Gusmão hamutuk ho Konselleiru Superiór no ekipa jurídika kona-bá kestaun Fronteira Terrestre no Marítima realiza enkontru estratéjiku ida iha Londres, Reinu Unidu, durante loron rua 19 to’o 20 setembru 2025 hodi esplora estratejia kona-bá saida mak Timor-Leste (TL) sei defende iha negosiasaun da-huluk ho Indonézia kona-bá Fronteira Marítima iha inísiu Dezembru 2025.
“Ha‘u mai Londres ho ekipa tomak hosi Gabinete Fronteiras Marítimas Timor-Leste nian, hasoru-malu ho advogadu sira ka Legal counsel tanba iha fulan Agostu liu-bá ekipa ida hosi Repúblika Indonézia bá ona Dili hasoru-malu ho ekipa Timor-Leste nian atu hahú ko‘alia kona-bá Fronteira Marítima ho Indonézia,” Primeiru Ministru, Xanana Gusmão iha nota komunikadu imprensa ne’ebe Neon Metin asesu husi Gabinete Primeiru Ministru, ohin Domingu 21/09.
Iha Inísiu Dezembru 2025, realiza primeira reuniaun formál kona-bá Fronteira Marítima ho Indonézia, tanba ne‘e durante loron rua ne‘e ekipa diskute hodi haree buat hotu-hotu tuir loos de‘it Lei Internasionál nian.
Xanana Gusmão rekoñese kontribuisaun hosi Michael Charles Wood hosi Britania ho sira seluk ne‘ebé ajuda tebtebes Timor-Leste, agora daudaun sira servisu nafatin hodi haree mós kazu sira seluk no sei fila-fali bá Timor atu ajuda nafatin iha prosesu negosiasaun ho Indonézia.
“Nune‘e durante loron rua ekipa hasoru-malu hodi kombina no haree saida mak Timor-Leste bele defende bainhira iha negosiasaun ho Indonézia iha inísiu Dezembru 2025,” Xefe Governu ne’e hateten.
Oras ne’e daudaun Timor-Leste iha hela faze preparasaun bá negosiasaun kona-bá Fronteira Marítima ho Indonézia no ohin hato‘o rekoñesimentu bo‘ot ida hodi Prezidente Repúblika nia naran ho povu Timor-Leste nia naran agradese bá sira hotu.
Matenek hotu-hotu ne‘ebé sira fó bá Timor-Leste to‘o bele manán tiha Austrália, agora mós PM Xanana fiar katak sira sei fó nafatin apoiu atu bele manán Indonézia.
DLA Piper mak empreza advogadu ida ho eskritóriu sira iha nasaun liu-40 iha Amérika, Ázia-Pasífiku, Europa, Áfrika no Médiu Oriente.
Ida-ne’e harii iha tinan 2005 liu-hosi fuzaun hosi empreza advogadu tolu mak hanesan: Gray Cary Ware & Freidenrich LLP ne’ebé ho nia sede iha San Diego, Piper Rudnick LLP ne’ebé ho nia sede iha Baltimore no DLA LLP ne’ebé ho nia sede iha Reinu Unidu.