Reportajen Silvino Freitas
Hafoin rezultadu debate ba lei revogasaun ba pensaun mensal vitalisia ba deputadu no eis titular sira neebe passa ona iha parlamentu nasional ho votu unanimidade afavor 62, kontra laiha abstensaun laiha , maka Estudante Universitariu Timor Leste (EUTL) konsidera revogasaun nee laos inisiativa no vontade husi deputadu nain 65 iha parlamentu nasional maibe nee presaun husi povu timor-leste neebe liuhusi EUTL halo ba politiku sira neebe reprezenta partido hodi tuur iha uma fukun parlamentu nasional hodi fo presaun ba sira atu halakon tiha lei nee, tanba lei refere fo bokur deit ba elite politika sira, maibe povu nia ekonomia kontinua krekas.
Portavos EUTL Jose da Costa dehan, debate ba revogasaun lei pensaun vitalisia nee iha ona final global durante votasaun ba iha espesialidade artigu sira laiha deputadu ida maka vota kontra no abstensaun maibe hotu-hotu afavor, nunee EUTL nia luta sei la too iha nee deit tanba lei nee sei lori ba prezidente atu hetan promulgasaun ho dinamika politika nee lai sira nafatin akompana wainhira lei nee sei lori ba prezidente da republika.
“dinamika politika ohin loron ita hotu akompana orsida partido ida nee dehan ami mak halakon no partido ida seluk dehan sira maka halakon, baa mi nia pozisaun klaru laiha partai A no B mak halakon maibe nee luta EUTL nian maka konsege halo presaun politika ba parlamentu nasional hodi ejiji halakon lei mensal pensaun vitalisia” Portavos EUTL Jose da Costa, hafoin akompana debate lei revogasaun pensaun vitalisia iha parlamentu-nasional, (25/09).
Nia dehan tan, halakon pensaun vitalisia nee presaun husi povu timor leste neebe liuhusi EUTL hodi halo presaun politika ba parlamentu-nasional halakon lei pesaun vitalisia, tanba ejijensia sira nee mosu tanba kondisaun ekonomia nasaun nian neebe ejiji tenke halakon duni lei refere, tanba parlamentu-nasional tenke aprova osan $5 miloens kada tinan hodi selu eis deputadu no eis governante sira nunee kondisaun ida nee maka ejiji povu hamriik hodi halo presaun ba politiku sira neebe tuur iha parlamentu tenke muda.
“ami laiha nesesidade laiha tempu para atu fo agradesimentu ba sese deit, ami agradese ba povu maubere neebe hamutuk ho EUTL, laos agradese fali ba partido neebe maka hanesan deit tinan ba tinan, deskuti nein tau ajenda atu halakon pensaun vitalisia” dehan potavoz Jose.
Sorin seluk portavoz EUTL Natalicio Nunes Matins dehan, informasaun balun neebe dehan halakon pensaun vitalisia nee programa partidu nian nee falsa ka laloos, nunee regovasaun nee laos vontade deputadu no prezidente parlamentu nasional nian maibe nee ejijensia povu nian atu halakon lei pensaun mensal vitalisia, maski lei nee passa ona iha parlamentu nasional maibe sei iha prosesu lobuk ida maka sei lori ba prezidente republika atu hela promulgasaun no sei publika iha jornál da republika hafoin maka ita dehan adeus lei pensaun mensál-vitalísia no bemvindo poupansa ba orsamentu jerál estadu nian.
“ita husu nafatin publiku estudante kamada social atu bele akompana nafatin prosesu ida nee tanba ita seidauk iha rezultadu ida neebe serteza tanba iha ona rezultadu serteza bainhira publika ona iha jornal ba republika tanba nee husu nafatin ba publiku atu akompana prosesu sira nee” dehan portavoz Natalicio.
Entretantu projeitu lei numeiru 11/6(3a) Revoga pensaun mensal vitalisia ba deputadu no eis titular ba orgaun soberania no ba providensia seluk (ho efeitu retroativu hahu husi 20 de maio 2002) passa iha debate jeneralidade ho votus afavor 61 kontra 0 abstensaun 0, iha passa iha final global ho votus afavor 62 kontra 0 abstensaun 0.
