Reportajen Silvino Freitas
Jornalista nain 5 ne’ebé militar Indonesia sira oho iha Balibó mak Greg Shackleton, Tony Stewart, Gary Cunningham, Briam Peters, Malcom Rennei inklui Roger East sira nia sakrifisiu atrai ema barak husi Australia mai Timor Leste iha momentu krítiku istória Timor nian, jornalista nain 5 nia mate hamoris kolaborasaun entre média professionál Australia no Timor Leste no haforsa ligasaun entre povu Australianu no Timoroan.
Embaixadora Australia iha Timor Leste Caitlin Wilson dehan, nia lori governu Australia nia naran rekoñese família no kolega matebian sira nian tristeza no sentimentu laran susar ne’ebé sira esperénsia durante tinan 50 nia laran, nune’e mos família no kolega ne’ebé ho manaira oioin hodi kontinua preserva matebian sira nia memoria viva sira, tanba jornalista nain 5 nee mai Timor Leste atu haklean istória importante ba akontesimentu ne’ebé ema hotu la hatene iha momentu ne’ebá.
“Sira nia servisu no sakrifisiu atrai ema barak husi Australia mai Timor Leste iha momentu ida ne’ebé krítiku iha Timor Leste nia istória, jornalista sira ajuda kria koneksaun entre povu Timoroan no Australianu ne’ebé sai metin liu tan, agora istória Balibó Five nee kuda metin ona iha Timor Leste nia istória” dehan Embaixadora Australia iha Timor Leste Caitlin Wilson iha komemorasaun tinan 50 trajedia Balibó iha postu administrativu Balibó, (16/10).
Nia dehan tan, jornalista nain 5 nia mate ne’e moris ona iha seitor média ne’ebé dinamiku tebes nune’e jornalista sira kontinua buka lia loos ho korajen no integridade, nune’e mós moris nafatin amijade no kolaborasaun entre média professionál entre Australianu no Timoroan sira nunee mós iha ligasaun komunidade iha baze kria husi empatia solidaridade no valor ne’ebé hanesan.
“Ohin iha Balibó hau orgullu atu anunsia lansamentu bolsu estudu jornalizmu ba interese públiku ne’ebé fornese husi embaixada Australia nian liuhusi parseria ho ABC ID” dehan embaixadora Caitlin Wilson.
Nia konklui, dadaun Balibó iha ezemplu barak ne’ebé fo sai oinsá nasaun rua iha ligasaun ne’ebé buras, uma ne’ebé jornalista sira iha ne’e preserva ona husi Balibó House Trust, ne’ebé apoiu projetu dezenvolvimento lokál sira nune’e sosiedade-sivil inklui sindikatu sira no klaru jornalista sira nia família rasik halo ona papél importante hodi mantein memoria Balibó Five no Roger East nia moris, matebian Balibó Five no Roger East marka momentu nakukun ida iha istória ida ne’ebé nasaun rua ne’e fahe hamutuk, sira nia legadu sai hanesan ponte ida ne’ebé liga nasaun liuhusi kompaisaun, kooperasaun no respeita malu.