Reportajen Silvino Freitas
Sosiedade-Sivil liuhusi Diretór Executivu Forum Organizasaun Naun Governmental Timor Leste (FONGTIL) konsidera asaun Sekretáriu Estadu Asunto Toponímia no Organizasaun Urbana (SEATOU) sobu baraka komunidade nia iha areadores palásiu Prezidente Republika nian ne’e hatun integridade Prezidente Republika hanesan orgaun soberania numeiru um iha Republika Demokratika Timor Leste (RDTL).
Diretór Executivu FONGTIL Valentim Pinto dehan, tuir loloos labele hamosu asaun radikal hanesan ne’e maibé tenke iha lina koordenasaun entre Prezidente Republika ho ministeriu relevante sira liga ho atividade Prezidente nian, nune’e asaun sira hanesan ne’e bele hatun integridade Prezidente Republika nian planu hotu hotu ho intensaun di’ak atu promove alegria ba sidadaun hotu hotu iha espasu sira hanesan ne’e.
“Entaun ita tenke kordena malu ho diak atu labele hamosu disputa sira hanesan ne’e, liliu ba Prezidente Republika kuandu hetan asaltu ida hanesan ne’e ita atu hateten saida ba ema no ema hateten saida ba ita” dehan Diretór Executivu FONGTIL Valentim Pinto iha Tower Fatuhada, (18/12).
Nia dehan tan, tanba utiliza espasu sira hanesan ne’e la’ós permanente maibé temporariu de’it tanba ne’e tenke tulun sira hodi organiza ho harmonia la’ós uza asaun brutal sira nune’e hodi hatudu imajen ne’ebé la di’ak ba ita nia orgaun soberania sira liuliu Prezidente Republika ne’ebé hanesan orgaun soberania numeiru um no sai simbolu ba nasaun nian, bele iha diferénsia la kontaktu maibé tenke iha intervensaun ne’ebé dignu atu labele afeta ba integridade orgaun soberania nian.
“Iha meius seluk atu koordena la’ós halo intervensaun para sobu, ne’e la’ós ema bainbain mak halo ne’e inisiativa Prezidente Republika nian tanba ne’e tenke konsulta ho gabinete prezidente, tenke maneja ho di’ak la’ós limite ema seluk nia atividade no ema seluk bele foka hodi afeta ba integridade orgaun soberania nia koordenasaun ba malu” dehan Valentim.
Feira ne’ebé halo iha areadores palásiu Prezidente Republika asaun ida ho inisiativa Prezidente Republika nian atu festeza loron boot Natal ho tinan foun, maibe iha dezentedimentu ne’ebé mosu maka parte ekipa SEATOU sobu baraka sira ne’ebé harii husi komunidade sira, nune’e postajen husi Prezidente Republika Jose Ramos Horta iha ninia konta ofisial Facebook hateten, lalika komentarius, arrogansia la presiza lia fuan barak, iha fatin parking kareta Presidensia nia Sr. Germanu ho nia ema sobu pobu nia barraka ke inisiativa Presidensia ho Presidente Munisipiu Dili, ohin atu inaugura feira e festa natal eventu.