Reportajen Silvino Freitas
Kazu moras HIV nee dadaun nee parte Insituto Nasional Kombate SIDA (INCSIDA) hamutuk ho Ministeriu Saúde rejista liu rihun ruanulu no kada tinan numeiru kontinua aumenta rua to’o tolu, nune’e INCSIDA kontinua enkoraja joven sira atu bele moe no tauk hodi voluntariamente ba hasai raan hodi teste tanba liuhusi teste raan mak identifika moras tanba dadaun INCSIDA susar atu kontrola seksu livre neebe akontese fatin fatin.
Prezidente INCSIDA Daniel Marçal dehan, tuir dadus neebe fo sai ema neebe kona moras HIV mak dadaun nee halo hela relasaun seksual livre, nunee nasaun tama iha riku tanba difisil atu kontrola atividade seksu livre neebe ema halo iha fatin fatin nunee joven sira tenke kuidadu ho seksu livre tanba iha kontribuisaun boot ba transmisaun HIV, too dadaun nee kazu infetadus ba HIV too 2000 iha tinan 20 resin nia laran tanba atividade seksu livre neebe susar atu regula.
“ita haree iha estatistika tinan tinan nee la aumenta barak aumenta ida rua deit, nee tanba ema barak kona HIV lakohi ba teste raan maibe halo beibeik seksu livre nee mak aumenta hela kazu foun” dehan Prezidente INCSIDA Daniel Marçal hafoin sosializasaun iha eskola teknika informatika Dili, (16/02).
Nia dehan tan, nunee durante nee parte saude identifika ema hamutuk 2500 mak infetadu moras HIV hodi sira konsumu ona ai-moruk nunee bele mantin ho pozisaun HIV hodi moris hanesan mos sidadaun bainbain, nunee perigu mak ema neebe infetadu ho HIV lakohi ba teste raan nunee bainhira sira kona ona SIDA tama ospital mak foin hatene, durante servisu hamutuk entre INCSIDA ministeriu saude Maluk Timor ho mos klinika sira neebe halo teste raan nee mak idetifika ona balun maibe iha preokupasaun ida mak laiha ema voluntario ba teste raan.
“INCSIDA ba halo atividade fatin fatin nee koopera ho ministeriu saude halo teste raan nafatin husi teste raan mak bele hatene, se lae ita labele idetifika ema sei mate mohu deit tanba aimoruk laiha” dehan Daniel Marçal.
Nia dehan tan, ema sira neebe halo vida livre tauk no moe atu ba teste raan maski sira la hatene katak moras nee iha maibe moras refere dadaun nee moris iha ema barak barak nia moris, ema neebe identifika ona dadaun nee hemu ona aimoruk nunee sei la transmiti ba ema seluk maibe sira neebe dadaun halo hela vida livre mak lakohi teste raan sira maka sei estraga nasaun no sei halo ema barak mate tanba HIV, tanba sira halo vida livre la tauk maibe atu ba teste raan sira tauk fali.
“seksu livre nee iha timor nee barak nee laos ema kiik deit mak halo ema boot mos halo, ema balun buka osan hanesan nee atu bele hatutan sira nia moris, tanba ita nia maluk sira neebe gosta halo seksu livre nee barak sira mak sei estraga tiha nasaun nee tanba seksu livre lakohi uza protesaun nee problema boot iha ita nia rain laran” konklui Prezidente INCSIDA Daniel Marçal.