Reportajen Silvino Freitas
Relasiona ho kazu avo baku nia beioan iha aldeia Oplegul suku Holsa postu administrativu Maliana neebe viral iha media-sosial maka reprezentante povu iha uma fukun parlamentu-nasional husu Unidade Pesoal Vulneravel (VPU) no Ministeriu Publiku atu trata ho seriu no konsidera kazu krime publiku no violensia domestika.
Deputada Maria Gorumali Barreto dehan, kazu violensia domestika neebe akontese iha munisipiu Bobonaro iha postu Maliana suku Holsa aldeia Oplegul neebe viral iha media sosial neebe polisia foti ona arguido hodi halo prosesu investigasaun, nunee nia husu ba autoridade relevante neebe responsabiliza ba kazu violensia domestika no kazu violensia bazeia ba jeneru hanesan VPU no ministeriu publiku, atu trata asuntu nee ho seriu hodi konsidera kazu refere ho krime publiku no kazu violensia domestika.
“ita iha lei kontra violensia domestika neebe iha artigu 3 ho 4 neebe koalia konaba tipu violensia neebe konsidera violensia domestika neebe maka psikolojia violasaun seksual ekonomia nomos fiziku neebe hasoru feto” dehan Deputada Maria Gorumali Barreto iha intervensaun iha plenaria parlamentu-nasional, (30/03).
Deputada Maria Gorumali Barreto tan, kazu neebe nia mensiona nee kazu krime, fiziku no mental psikolojia nee tama hotu iha laran nunee autoridade relevante tenke tau atensaun ba kazu refere no labele konsidera kazu nee hanesan avo eduka nia oan tanba kazu neebe akontese hatudu ba publiku katak kazu nee krime no kazu refere haree didiak husi akontesimentu neebe viral iha media sosial nee kazu neebe planeadu entre ema nain rua avo mane ho avo feto.
“tanba saida maka hau dehan planeadu tanba avo mane baku hela avo feto ba buka tan fali aisanak mai fo avo mane para baku tan, alin feto nee minoridade 16 anos ita mos iha lei protesaun labarik tanba nee husu ba PNTL no ministeriu publiku atu kaer lei kontra violensia domestika lei protesaun kriansa no lei joven em perigo hodi hodi kondena ba autor violento sira neebe halo vilensia hasoru labarik ida nee” konklui Deputada Maria Gorumali Barreto.