Reportajen Estajiariu Isác Nidio Sarmento
Diresaun Nasionál Sistema Informátiku (DNSIT) liuhusi programa HANDS halo lansamentu bá video ksolok-labarik ho episodio 6 ajuda labarik sira hanorin karakter ne’ebé di’ak bá sira para atu oinsá sira bele pasiensia hala’o sira nia atividade sira nia servisu hodi prepara sira nia an bá aban bainrua, nunee video nee espesifiku liu ba labarik sira husi eskola Pre-eskolar no Ensinu Baziku no video refere aprezenta bá públiku liu-liu bá labarik sira atu asiste tanba video ne’e hanesan dalan ne’ebé edukativu.
Diretór DNSIT Jonio Guterres Rosario, projetu video labarik nee rezultadu husi servisu maka’as no kolaborasaun ne’ebé metin, video neen ne’e ninia pre-produsaun, iha tinan 2025 liubá ne’ebé envolve funsionariu sira no mós labarik estudante sira ne’ebé mak halo ona gravasaun ka produsaun iha studio ministeriu edukasaun vila-verde balun iha uma no balun mos halo cisto rei depende bá konteudu iha video nian.
“eventu lansamentu ohin loron ho objetivu klaru liuhusi aprezentasaun ofisialmente video ne’e bá públiku no bá ita boot sira hotu atu bele iha kuñesementu, atu atinji objetivu ida ne’e ami konvida partisipante husi parte oin-oin hahú husi manorin sira, labarik pré-eskolár no EBC sira, joven sira, inan-aman no parseiru sira, husi ami-nia parte ami hein katak apoiu lansamentu ohin públiku sira komprende no valoriza liután video ksolok labarik ida ne’e” dehan Diretor Jonio ba jornalista sira hafoin halo lansamentu ba video labarik iha EBC Farol, (15/04).
Fatin hanesan Jestór Programa HANDS Agosto Ferreira Soares dehan, programa HANDS ne’e rasik hanesan programa Ministerio da Educação nian no hetan fundus husi governu Nova Zelandia hodi produz video ksolok bá labarik iha tinan 2025, durante ne’e ekipa sira servisu maka’as tebes hodi atinji finalidade husi video ne’e rasik, tanba ne’e HANDS hamutuk ho DNSIT hanesan diresaun ne’ebé importante tebes no involve mós husi tekniku GDCRP sira hodi produz video episode neen atu fornese bá Pré-eskolár, EBC no mós labarik sira ne’ebé iha uma, ne’e ajuda labarik sira dalaruma hanorin karakter ne’ebé di’ak bá sira para atu oinsá sira bele pasiensia hala’o sira nia atividade sira nia servisu, prepara sira nia aan bá aban bainrua.
“Episode neen ne’e ita foku bá ida primeiru mak ita koalia konaba akai ho ninia kareta, segundu mak foka liubá labarik sira oinsá iha laran di’ak atu bele ajuda malu, ida seluk haree konaba oinsá labarik sira kuidadu ambiente katak tau lixu iha ninia fatin, ida seluk mós hanorin labarik sira atu agradese no fó obrigadu, ida fali tito ho nia brinkedus liu-liu oinsá hanorin labarik sira atu kuidadu sira-nia sasan sira wainhira halimar hotu tiha tau fali iha nia fatin no ida seluk mak hanorin labarik sira oinsá pasiensia” dehan Jestór programa Agosto Ferreira.
Agosto Ferreira dehan tan, orsamentu ba prosesu produsaun video refere ho montante $5.000 sira bele produz video episode neen to’o bá lansamentu video refere, nune’e video hirak ne’e mós sei publika iha Youtube Ministerio nian no mós HANDS nian hodi hafasil audensia sira atu asesu, nunee durasaun ba prosesu produsaun filme nee rasik dura fulan 5 ka 6 de’it hahu husi fula junu too outubru tinan 2025, tanba kestaun presija tekniku sira haree identifikasaun fatin prepara planu husi pre-produsaun to’o produsaun to’o editing to’o mós finalize video sira ne’e hotu.
Reprezentante Ministry of Foreign Affairs and Trade (MFAT) Peter, sente orgullu tebes tanba bele lansa ona video ne’e bá públiku, nia mós sente orgullu tebes tanba liu husi Governo Nova Zelandia bele suporta ona inisiativa bá programa ne’e hamutuk ho Ministerio da Educação hodi produz serie labarik nian hodi garante edukasaun ne’ebé kualidade ho episode ne’e nakonu ho ksolok hodi bele uza iha eskola iha komunidade no iha uma, liuhusi istoria sira konaba laran di’ak, pasiensia, agradesimentu no kuidadu bá meiu ambiente, video sira ne’e koalia konaba labarik ki’ik sira-nia fuan no hanoin.
“Ho lansamentu ohin loron ami enkoraja manorin sira atu atu integra video sira ne’e iha imi-nia klase laran, ami mós konvida inan no aman sira atu uza materiál sira ne’e iha uma no ami espera katak ita-nia parseiru hotu iha governo no iha komunidade dezenvolvimentu sira atu sai sasin bá inisiativa ne’e no hodi habelar iha Timor-Leste laran tomak” konklui Petter.