Reportajen Silvino & Estajiariu Quintiliana
Komisariu Asistente Polisia Nasional Timor Leste (PNTL) ho naran inisial JM hamutuk ho nia eskolta ho inisial BS halo agregasaun fizika ‘basa’ inan faluk Filomena Soares iha nia rezidensia aldeia Namanei suku Makadiki postu Uatulari tanba du’un faluk ho buan ka kaer ai-moruk, asaun refere Provedoria dos Direito Humano e Justica (PDHJ) kondena maka’as ofisial superior nia hahalok tanba krime no halo traisaun ba komprimisiu de onra hodi basa ema iha publiku.
Oan vítima Marciana Soares dehan, iha altura neeba iha loron segunda lokraik nia inan homa katupa no bola trigu too tuku sia kalan nia inan kontinua sona dosi no tein katupa derepenti deit too dader tuku 2:24 madrugada tama ona ba loron tersa feira 21 fulan abril tinan 2026 hakfodak rona lian husi liur ema lubuk ida hakilar dehan ‘tuda tuda karik nia halai’ maibe nia hanoin atu duni animal tanba nia lahatene buat ruma no kontinua sona dosi, no sira komesa ho lian makas ‘oi ferik o sai mai lai’ maibe nia okupadu ho sona dosi no tanba bolu beibeik entaun nia obriga nia atu husik servisu hodi sai ba hasoru sira no nia sai ba liur hodi hasoru sira.
“depois nia hakat sai mai husi dapur mai iha liur hetan kedas basa makaas husi oknum PNTL JM asistente komisariu fitun ida halo nia oin halai no monu kedas iha nia ain” dehan Oan vitíma Marciana Soares liuhusi konferensia impresa iha Hera Hali Dolar, (12/05).
Marciana haktuir tan, hafoin monu tiha nia koko hamriik maibe nia eskolta ho inisial BS ho diviza ajente prinsipal kontinua hanehan nia kabaas rua ba rai hodi hakilar ‘o nee buan o nee kaer aimoruk a’at’ no nia hakneak duni iha komadante polisia JM nia ain hodi tanis no hakilar hateten ba sira katak nia la halo ritual aat nee no sira husi hela vitima hodi sira fila fali ba sira nia uma neebe ho distansia 50 metru husi vitima filomena nia uma, remata akontesimentu refere iha rai naroman nia ba liu merkadu atu faan nia dosi tanba nia kreditu osan husi banku Moris Rasik no kada semana tenke hatama osan ba banku $59, hafoin fila husi merkadu nia informa kedas ba xefi aldeia atu halo aproximasaun hodi resolve kazu refere, maibe too komadante ho nia eskolta nee fila mai Dili too dadaun nee la resolve too agora.
“husi problema nee iha loron 23 fulan abril tinan 2026 nia hatoo keixa ba eskuadra PNTL Uatulari maibe maibe komadante eskuadra konsola atu resolve deit iha aldeia tuir familia deit” dehan oan vitima.
Familia Vítima Aleixo de Souza dehan, asaun neebe membru PNTL nee halo ba inan faluk Filomena Soares hanesan asaltu ida tanba asaun nee halo iha tuku 2 madrugada neebe uza poder, tanba nee sira sei hatoo keixa ba Prezidente Republika, Ministeriu justisa, PDHJ, sosiedade sivil, parlamentu nasional, tanba nee oknum polisia labele husik atu halo asaun sira nee nafatin tanba karik husik sei halo mos asaun hanesan ba ema seluk.
“hanesan familia vitima hateten katak vitima ba aprezenta ona iha eskuadra Uatulari neeba maibe too dadaun nee problema la mai nasional tanba saida, tanba deit iha poder karik tanba nia kbiit laek lian laiha hanesan joven ami nia lian mak agora too ona ba nee ohin remata ida nee ami sei aprezenta ba ministeriu publiku” dehan Familia Vítima Aleixo de Souza.
Relasiona asuntu nee jornalista konfirma ho Provedor Direitu Umanu Justisa (PDHJ) Virgilio Guterres dehan, asaun neebe ofisial polisia halo ba sidadaun nee krime no halo traisaun ba nia komprimisiu de honra tanba nia atu sai polisia nee atu servi povu entaun nia liman kuandu basa sidadaun nee nia basa povu, entretantu ofisial publiku sira neebe halo asaun hasoru sidadaun nee sira laos viola konduta deit maibe halo traisaun ba juramentu neebe sira halo hodi servi povu no nasaun.
“nee krime nia kontra nia kodigu rasik nia halo traisaun ba ninia komprimisiu de honra, ofisal publiku se deit atu guarda prizional atu polisia ka militar kuandu baku ema sivil nee laos deit viola nia konduta professional maibe sira halo traisaun ba sira nia komprimisiu de honra” dehan Provedor Direitu Umanu Justisa (PDHJ) Virgilio Guterres.
Nia dehan tan, hanesan provedor nia kondena makaas hahalok element polisia neebe halo basa ema nee tanba karik sidadaun ruma halo sala maka apriende kaer lori ba sala detensaun laos basa iha publiku, tanba nasaun nee demokratiku laos ditadura neebe hanesan uluk liurai sira baku ema iha dalan tanba komandu PNTL atu foti medida ba element sira neebe la kumpri regra polisia nian no elementu sira neebe ninia hahalok hafoer entidade estadu nian. Vitima Filomena Soares feto faluk neebe laen mate husik hela nia ho oan nain 6 iha tinan 2019, dadaun nee vitima mesak hela iha Uatulari no nia oan sira iha hotu Dili no nia servisu lorloron mak halo negosiu liuhusi faan dosi no halo katupa faan iha merkadu Uatulari