Reportajen Silvino Freitas
Relasiona ho postajen husi sidadaun Eugenio Sarmento hasoru asaun Sekretáriu Estadu Asunto Toponimia no Organizasaun Urbana (SEATOU) ne’ebé hateten asaun hanesan ‘Bandalizmu’ maka Polísia Nasionál Timor Leste (PNTL), liuhusi eskuadra Nain-Feto identifika no bolu Eugenio Sarmento hodi hatan ba postajen refere, nune’e asaun SEATOU ne’e halo intervensaun ba atividade Bar iha Bemori iha kalan hodi hapara atividade tanba loke muzika ne’ebé halo barullu iha públiku.
Eugenio Sarmento dehan, asaun ne’ebé governu halo liga ho dezenvolvimento nia sempre promove liuhusi ninia konta Facebook maibe iha asaun ne’ebé la di’ak nia mos la nonok tanba lakohi halo an hanesan makerek tanba ne’e maka nia halo postajen ida iha média sosial ba asaun ne’ebé SEATOU halo ba nia mane foun ho oan nia Bar laiha konesimentu no notifikasaun ruma iha tempu loron ba uma nain maibé tama hodi sobu deit, nune’e nia konsidera asaun ne’ebé SEATOU halo ho karakter bandalizmu.
“Ami mos halo keixa ba tribunal la’ós bolu hau mai hatan iha ne’e maibé ami prepara ona karta ba Ministériu Públiku tanba ita ne’e iha lei, ita halo postajen ne’e laos particular odio tanba hau ema ida orgullu SEATOU nia servisu maibe iha sala ita tenke hadia” dehan Eugenio hafoin hatan ba notifikasaun husi polísia Eskuadra Nain Feto Dili, (25/05).
Nia dehan tan, atuasaun polísia eskuadra Nain Feto ba iha nia rezidensia ho respeita liuhusi dialogu hodi lori nia ba hatan notifikasaun ne’ebé parte polísia fo ba nia, nune’e notifikasaun ne’ebé husi parte polísia fo ba nia ne’e hanesan povu hasoru governu ne’ebé nia parte prontu atu hatan, no nia sei la dada publikasaun ne’ebé nia halo ona iha nia konta Facebook ne’ebé hateten bandalizmu ba servisu SEATOU nian.
“Liafuan ida kona-ba bandalizmu kerdizer ita tama uma ida la buka uma nain atu ko’alia maibé ko’alia fali ema sira iha Bar nee ida ne’e ida ne’e halo parte ba bandalizmu, ita nia etika laiha hanesan timoroan ho membru governu ida hatudu mos respeitu mos ba ema kiik sira antes halo asaun” dehan Eugenio.
Husi identifikasaun ne’e Komadante Operasaun Munisípiu Dili Luis Amaral dehan, postajen ne’ebé mak Eugenio Sarmento halo maka husi parte polísia bolu informasaun kona-ba nia postajen tanba iha momentu halo atuasaun Eugenio mos laiha fatin atuasaun tanba nee mak polísia bolu atu husu tuir kronolojia loloos ba Eugenio, tanba asaun ne’ebé SEATOU halo nia mos laiha fatin refere maibé rona tutan husi nia oan tanba ne’e karik la satisfaz bele tuir dalan legal la’ós husi fali média sosiál.
“Kuandu sente servisu SEATOU nia laloos bele halo keixa ba parte hanesan PDHJ para bele haree liutan servisu governu nian” dehan Komadante Operasaun Munisípiu Dili Luis Amaral iha kuartel jerál PNTL Kaikoli.