Reportajen estajiariu Isac Sarmento
Rádio Televisão de Timor-Leste, Empresa Pública(RTTL, E.P) asina akordu ho empreza Esperança Timor Oan(ETO – Telco) hodi hetan direitu bá transmisaun direita Copa mundial 2026 , nune’e kontratu ne’e rasik ho orsamentu 200 mil dólares bá jogu hamutuk atus ida haat (104) durante fulan ida nia laran.
Presidente RTTL, E.P Rosario da Graça Maia dehan, sente orgullu tebes asina kontratu ho ETO – Telco tanba RTTL bele hetan direitu hodi halo transmisaun direita bá Copa mundial refere, tanba Copa mundial hanesan festa boot ida iha mundu tomak, nune’e bele motiva futebolista Timor oan sira ne’ebé mak hahú kareira profesionál iha futebol.
“RTTL mós agradese tebes nuno governu konstituisionál liuhusi SECOMS ne’ebé disponibiliza orsamentu atu RTTL halo transmisaun direita bá kuaze jogu atus ida haat (104) durante fulan ida resin nia laran bá eventu boot ida ne’e” dehan prezidente RTTL, E.P Rosario da Graça Maia, (22/05).
Nia haktuir liuhusi transmisaun direita ida ne’e espera Timor oan sira bele kontente, nune’e Nia kompremitidu RTTL sei oferese programa ne’ebé ho kualidade di’ak liu hodi lori jogu Copa mundial ne’e bá Timor oan tomak durante fulan ida nia laran.
Entertantu jerente ETO – Telco Edmundo Freitas garante katak jogu 104 durante fulan ida nia laran sei fó sai bá públiku ho di’ak hodi públiku asiste bazeia bá akordu ne’ebé mak asina ona.
“asina akordu atu transmite Copa mundial 2026 ne’e bá iha teritoria Timor laran tomak iha pontu tolu ne’ebé mak ami konkorda hamutuk, primeiru ETO – Telco garante fó sub lisensa free to air bá RTTL atu RTTL bele transmite bá teritoriu Timor laran tomak, segundu ETO – Telco garante jogu 104 jogus ne’e atu atu fó sai ho di’ak no mós garante teknikamente atu down feed signal ne’e to’o iha RTTL nia studiu depois terseiru ETO – Telco fó oportunidade bá RTTL atu jere rasik sira-nia konteudu para fó sai bá teritoriu Timor laran tomak” dehan jerente ETO – Telco Edmundo Freitas
Nia afirma kontratu bá Copa mundiál ne’e rasik ho orsamentu 400mil dolares no fó lisensa bá RTTL free to air ho osan 200mil dólares bá 104 jogu refere.
Fatin hanesan Secretaria Estado Comunicação Social(SECOMS) Expedito Dias Ximenes hateten kontratu ne’e sei hahú husi dia 11 de juñu to’o fulan jullu liu, nune’e akordu ida ne’e hatudu katak RTTL, E.P ho ETO – Telco prontu ona fó sai Copa mundial ne’e bá públiku.
“Servisu hamutuk ida ne’e ETO ne’ebé hanesan nia iha direitu transmisaun tanba nia mak manan direitu transmisaun ne’ebé halo iha Singapura é ETO buka oinsá mak servisu hamutuk ho governu husi SECOMS é RTTL hanesan orgaun ne’ebé estadu nian atu bele fó transmisaun bola ne’e tantu jogus ne’e durante fulan ida resin iha 104 jogus”konklui SECOMS Expedito Dias Ximenes
Nia dehan nuno governu sente ida ne’e importante tebes bá iha populasaun atu asiste tanba ne’e governu aloka osan 200 mil bá RTTL atu bele ajuda fali bá ETO – Telco hodi hetan direitu transmisaun bá iha Copa mundial refere.
