Home Notisia Subsidiu Propinas no Pulsa Internet Ba Estudante Universitáriu Laiha Balansu

Subsidiu Propinas no Pulsa Internet Ba Estudante Universitáriu Laiha Balansu

409
0
Reprezentantes Universitariu iha Timor-Leste iha palacio prezidensial. [Foto: Santina | 11.08.2021]

Reportajen Santina Lucia da Costa

Reprezentantes Universitariu iha Timor-Leste hasoru malu ho Prezidente Republika, Dr. Francisco Guterres Lu-Olo, hodi aprezenta problema ekonomia, edukasaun no problema oioin ne’ebé kauza husi pandemia COVID-19, governu konsege impoin duni alternativa aula online ba estudante sira, maibé ida ne’e la efetivu.

Hafoin enkontru ba jornalista sira, Porta-Voz Estudante iha Timor-Leste, Revelino Elias Guterres informa asuntu sira ne’ebé hato’o ba Prezidente Republika relasiona ho problema ekonomia, eduksan no problema sira seluk ne’ebe kauza hosi pandemia COVID-19.

Nia dehan la’os ona segredu ba ita iha ambitu prevensaun covid-19 estadu impoin politika oioin atu salva sidadaun nia vida.

“Problema ne’ebé ami sira infrenta direitamente mak durante edukasaun paradu, ami la asesu ba aula, governu konsege impoin duni alternativa aula online, maibé ida ne’e la efetivu tanba estudante barak mak la asesu tanba limitasaun ekonomia.” Hateten porta- Revelino Elias Guterres iha Palasiu Prezidensial, Nicolau Lobato, Bairu-Pite, 11/08.

Revelino dehan lori kestaun sira ne’e mai hato’o ba Prezidente Republika oinsa maka bele utiliza ninia kompeténsia atu hatutan aspirasaun ne’e ba orgaun sira ne’ebé relevante, hodi buka alternativa sira ne’ebé di’ak ho lalais para bele responde problema sira ne’ebé hatoo.

Revelino dehan, Prezidente Republika konsiente katak problema sira ne’ebé durante hasoru la’os nia kauza maka pandemia, maibé tanba problema politika ne’ebé ita la konsege preparadu ho di’ak dezde Timor ukun rasik-an.

Iha fatin hanesan Estudante husi UNTL, Constantino de Jesus akresenta katak governu nia politika atu fó subsidiu propinas, no pulsa internet gratuita, kona-ba propinas nian ladun iha problema tanba aloka diretamente ba lista naran estudantes kada universitariu, maibe problema mak konaba pulsa internet, tanba estudante barak mak la asesu, inklui hau rasik la hetan husi operador Telkomsel, Timor Telekom no Telemor.

Constantino hatutan presiza verifika no kontrola tanba pulsa internet nia alvu loloos, ninia benefisiariu sira mak estudante sira, oinsa maka bele hetan hotu ida ne’e. Tuir nia observasaun katak alokasaun pulsa internet la efetivu liu

Nune’e mós, estudante finalista husi UNDIL, Daniel Ximenes reforsa tan katak, politika governu nian fó subsidiu propinas ba estudantes sira realiza duni, maibé haree ba nia progresu laiha balansu.

 “Subsidiu sira ne’ebé fó la bazeia kondisaun universitariu ninian, ezemplu hanesan, estudante ne’ebé livre teória ne’e sira fó de’it maka $ 57.50 cent, depois estudantes sira seidauk finalista ne’e sira hetan $ 130 dollar, maibé ita tenki halo analizasaun ba kondisaun universidade, liuliu ba sira ne’ebé livre teória tama ona ba faze monografia nian ne’e ninia nesesidade ne’e husu liu $ 57.50 sentavus, tanba ne’e mak subsidiu ne’ebé sira fó la apar ho kondisaun universitarius ninian.” Informa Daniel Ximenes.

Daniel dehan, kona-ba pulsa, estudante balun hetan ona, maibé realidade iha UNDIL seidauk  hetan pulsa ba internet.

Nia mós husu ba governu kona-ba pulsa internet ninian, fó ba estudantes sira tenki ho balansu haree universidade hotu, la’os haree de’it husi universidade publiku ida no privada ida.

Print Friendly, PDF & Email

LEAVE A REPLY

Please enter your comment!
Please enter your name here