Reportajen Santina Lucia da Costa
Xefe Estadu Maiór Jenerál Falintil- Forsas Defeza Timor-Leste (F-FDTL), Tenente Jenerál Lere Anan Timur hateten, ajente seguransa Polisia ho F-FDTL iha fronteira ne’ebé fasilita fali sidadaun tama sai ilegál ne’e krime, ne’e mak hetan duni sai.
Tuir Xefe Estadu Maiór Jeneral F-FDTL katak se mak fasilita sira sai no bele hasai
“Hau nian maka sira fasilita, hau duni sai, agora hau duni sai kedas, la’os duni sai de’it primeiru tenke sofre prosesu tenke sa’e nia, kastigu nia, depois maka duni sai, tanba ne’e kontra ninia juramentu, kontra ninia dever, misaun ne’ebe nia kumpri.” hateten, Xefe Estadu Maior Jeneral F-FDTL, Tenente Jeneral, Lere Anan Timur ba jornalista sira, hafoin enkontru semanal ho Prezidente Republika iha Palasiu Prezidensial Nicolau Lobato, Bairu-Pite, 11/8.
Lere Anan Timur hatutan tantu Polisia ka F-FDTL kuandu fasilita sidadaun tama sai ilegal krime ruma nia la serve atu hela iha instituisaun nia laran no haruka sai.
Lere mós husu ba Ministeriu relevante liuliu Seretariu Estadu Juventude Desportu (SEJD) tau atensaun seriu bainhira atu reativa fali atividade grupu arte marsiais.
“Ministériu ne’ebé relevante toma konta liuliu Sekretáriu Estadu Juventude Desportu (SEJD) tenke apresa ona, labele toba, reativa fila-fali arte marsiais depois laiha lei ruma kontrola sira.”dehan Lere
Nia subliña, sira ne’ebé ilegal ba ona, depois nusa mak ema la deteta, ba ne’e la kaer, fila-fali mak kaer, ida ne’e Polisia ho FDTL tenke halo investigasaun.
“Polisia ho F-FDTL tenki toma mos responsabilidade komandante Faustino, ami tenki asumi responsabilidade tanba saida maka la kaer sira Arte Marsiais.” afirma Lere Anan Timur.
Lere akresenta, reforsa deit fizikamente la rezolve problema, tanba iha ne’eba ne’e rai luan, povu ne’e mai husi funu iha esperiénsia, depois iha fronteira baliza ho Indonezia, baliza ne’e la’os distánsia kilometru 1, maibe uma tatis kona malu, bee matan ida de’it, animal ba han duut iha fatin ida de’it, tantu iha Oe-cusse, Maliana no Suai.
Nia dehan halo oinsa mak rezolve problema, ita nia komunidade iha fronteira tenke iha konxiénsia kona-ba situasaun ne’ebé agora ita hasoru liuliu corona.
Entretantu iha loron 7 Agusto Unidade Espesial Polisia (UEP) konsege detein sidadaun Timor nain 10 no sidadaun Indonesia nain ida, ne’ebe tenta tama ilegal ba Atambua.
