Reportajen estajiariu Isac Sarmento
Liga Futebol Timor-Leste (LFTL) epoka 2026 komisaun sei fa’an tiketi bá adeptus klubu sira ne’ebé asiste jogu iha estadiu munisipál Dili, nune’e kada tiketi ho folin $2.00 bá ema nain ida, nune’e husi osan sira ne’e bele ajuda fali klube sira hodi atende nesesidade jogador iha durante realizasaun eventu jogu, rezultadu osan husi tiketi refere sei fahe 60% bá klubu rua iha kada jogu no 40% sei utiliza bá nesesidade LFTL nian.
Vise Prezidente LFTL Osório Florindo hateten, iha mundu hotu futeból sempre iha tiketi tanba ne’e mak Timor-Leste mós tenta atu la’o tuir, la’os foin primeiravez fa’an tiketi refere, tinan hira liubá liga ne’e rasik fa’an tiha ona tiketi refere maibé para tiha no dadaun mak kontinua fa’an fali tiketi refere, nune’e osan husi tikete ne’e mak sei ajuda klube sira atu bele sosa nesesidade jogador sira nian kuandu presiza iha kampu laran tanba iha enkontru tekniku ne’ebé parte LFTL halo ho clube sira sempre hato’o preokupasaun konaba osan atu uza hodi sosa nesesidade sira hanesan bee no seluk tan.
“pelumenus ema mai nontong iha kadeira sira tur tanba ne’e mak ita fa’an tiket bá epoka ida ne’e, osan sira ne’e sei bá klube sira, tanba durante ami reuniaun dala hira ho klubu sira, sira sempre dehan osan lá to’o ne’ebé fa’an tiket ida ne’e atu ajuda mós klubu sira pelumenus sosa bee ka sosa extrafuling ruma ajuda klubu sira” dehan Vise Prezidente LFTL Osorio Florindo, (26/05).
Nia dehan tan, dalabarak sosiedade Timor-Leste toman asiste gratuita bá jogu futeból sira entaun wainhira sira rona informasaun konaba fa’an tiketi nian hamosu komentariu barak, tiketi hirak ne’ebé fa’an ne’e mós nia rezultadu la’os bá ema seluk maibé bá liga ne’e rasik hodi ajuda mós bá klubu sira, nune’e kada tiketi ida ho folin $2.00 bá adeptus nain ida hodi asiste jogu rua iha loron ida.
“ne’e ami koko hela bá tribun ne’ebé mak iha kondisaun, iha mahon udan ema labele halai, sorin ami seidauk haree, posibilidade sé ita bele fa’an mais presu ne’e tun liu é ami-nia planu se fa’an karik tribun Timur fa’an bá 50cent, bá tribun barat ne’e tanba kondisaun iha kadeira iha mahon ne’e ami fa’an bá 2dolar bá jogu rua” nia hatután.
Vísi-Prezidente Osorio konklui, osan husi tiketi ne’e rasik sei fahe 60% bá klubu rua iha kada jogu 40% bá kofre liga nian hodi halo pagamentu bá pulsa eletrisidade no mós bá funsionariu nain 18 ne’ebé mak servisu iha liga ne’e rasik.