Reportajen Isack Sarmento
Secretario de Estado do Ensino Secundário Geral e Ensino Secundário Técnico Vocacional (SESG-ESTV) halo lansamentu bá Programa Nacional de Equivalência ao Ensino Secundário(PNE-ES), nune’e programa ne’e nia objetivu mak atu fó oportunidade daruak bá sidadaun Timor oan inklui ema ho difisiensia ne’ebé mak la remata estudu iha ensino Sekundário hodi bele kontinua fali estudu to’o remata.
SESG-ESTV Domingos Lopes Lemos iha nia diskursu hateten, programa Nasionál Ekivalénsia Eskola Sekundaria ne’e hanesan objetivu prioritariu ida husi Nuno Governu konstituisionál iha ambitu edukasaun no aprendizajen durante moris tomak, nune’e liuhusi lansamentu refere hanesan pasu konkretu ida hodi transforma komprimisiu polítiku bá realidade edukativa.
“Programa ida ne’e mosu husi konviksaun katak edukasaun labele relasiona ho idade, limitadu bá tempu ka limitadu bá sosiál. joven adultu Timor oan barak mak interompe sira-nia estudu tanba razaun ekonómiku, família, profisionál ka sosiál, maibé sira nunka lakon sira-nia direitu atu aprende, atu kompleta ensinu sekundáriu no atu harii futuru ne’ebé di’ak liu bá sira-nia aan, sira-nia família no nasaun” dehan Sekretáriu Estadu Domingos Lopes Lemos hafoin lansamentu.
Nia dehan tan, PNE-ES nia objetivu prinsipál lolos mak fó oportunidade daruak bá sidadaun ne’ebé lakon eskola, tanba ne’e investimentu la’os de’it iha edukasaun maibé mós iha dignidade umana, inkluzaun sosiál no dezenvolvimentu nasaun nian.
“Mensajen bá ita-nia joven sira liu-liu sira ne’ebé mak la kontinua sira-nia ensinu sekundáriu ha’u hanoin ne’e oportunidade di’ak ida bá ita-boot sira, liu-liu joven sira para atu bele hola parte mós iha programa ne’e no sei prepara kondisaun sira atu nune’e programa refere iha janeiru 2027 bele habelar bá munisipiu sira seluk” nia hatután.
Entertantu Eduardo Tilman hanesan ema ho difisiensia nu’udar estudante ida husi programa refere sente orgullu tebes tanba governu bele lansa ona programa konaba edukasaun Ekivalénsia, hodi fó biban bá sira ne’ebé mak durante ne’e lá kontinua eskola tanba iha difikuldade balun.
“ohin governu halo lansamentu há programa ida ne’e ha’u sente hanesan kontente loos tanba liuhusi programa ida ne’e iha futuru ha’u mós bele hetan fila-fali ha’u-nia izasah no bele kontinua bá iha universidade” konklui Eduardo Tilman.