Reportajen Estajiariu Cristiano dos R. Gama
Ministériu Juventude, Desportu, Arte no Kultura (MJDAK) hamutuk ho UNFPA kontinua reforsa kapasidade joven sira liuhosi formasaun refresing Relasaun Saudavel ba fasilitador sira husi munisípiu 13, ho objetivu prevene isin rua sedu no harii uma kain antes idade to’o, ne’ebé sei sai dezafiu boot ba dezenvolvimentu sosial no ekonomia foinsa’e sira iha Timor-Leste.
Diretór Jerál Ministériu Juventude, Desportu, Arte no Kultura (MJDAK), Mario Tilman, hatete, atividade ne’e hanesan kontinuasaun ba programa ne’ebé hahú ona iha tinan 2022 no 2024.
“Partisipante sira ne’e tuir ona formasaun ba fasilitador ligasaun ba global. Desde ne’ebá sira konsege fasilita ona formasaun relasaun saudavel ba joven sira iha sira-nia munisípiu. Agora tempu ona atu halo refresing hodi hatene rezultadu ne’ebé sira konsege fasilita, no mós atu deskobre sira-nia kapasidade nu’udar fasilitador,” dehan Diretor Joventude Mario Tilman ba jornalista iha edifísiu MJDAK, Segunda 22/06.
Nia esplika formasaun refresing ne’e importante tanba kazu relasaun la saudavel entre foin sae iha Timor-Leste sei akontese barak. Fenomena hanesan isin rua sedu no forma uma kain sedu sei akontese bainhira idade seidauk to’o.
Tanba ne’e, materia sira ne’e atu sensializa no mentaliza fali foin sae sira kona-ba impaktu husi isin rua sedu no forma uma kain sedu. Se idade seidauk to’o, impaktu ba mentalidade no ekonomia boot. Alin mane sira ne’ebé seidauk prontu ekonomikamente, labele sustenta uma kain, no ida ne’e bele hamosu violénsia doméstika.
Maibé formasaun ne’e la’ós de’it ba foinsa’e feto, maibé importante mós ba mane sira atu komprende liu kona-ba responsabilidade no prevensaun.
Iha fatin hanesan, Reprezentante UNFPA iha Timor-Leste, Navchaa Suren, hatete programa relasaun saudavel ne’e UNFPA hala’o hamutuk ho MJDAK besik tinan 4 to’o 5 ona.
“Durante ne’e ita iha ona formador besik atus ida resin ne’ebé hala’o ona formasaun iha sira nia Munisípiu. Iha loron 5 nia laran ne’e, ami konvida sira mai hamutuk ho MJDAK atu haree fila fali sira-nia esperiénsia, obstákulu saida mak sira hasoru, no ami mós fo informasaun foun ne’ebé bele reforsa sira-nia kapasidade,” dehan Navchaa Suren.
Nia haktuir, formasaun ne’e la haree de’it ba kontéudu relasaun saudavel, maibé mós buka resposta ba dezafiu ne’ebé fasilitador sira hasoru iha terenu.
“Ita agradese tebes tanba formasaun ida ne’e sai ona formasaun regular iha sentru juventude munisípiu hotu. Ho ida ne’e, sentru juventude bele halo sira-nia formasaun regular kona-ba relasaun saudavel. Ami espera MJDAK sei kontinua fo apoiu atu espande liu tan, nune’e joven barak liu tan bele hetan benefísiu,” nia hatutan.
Partisipante sira mai husi sentru juventude 13 ne’ebé destakadu iha munisípiu hotu, inklui pontu vokál husi Ministériu Juventude no Agrikultura.
Programa relasaun saudavel ne’e parte husi esforsu governu no parseiru dezenvolvimentu hodi prevene isin rua sedu, forma uma kain sedu, no promove relasaun ne’ebé respeitu no saudavel entre foin sae sira iha Timor-Leste.