Reportajen Silvino Freitas
Sekretáriu Jerál partido FRETILIN Mari Alkatiri husu ba militante no kuadrus FRETILIN tomak atu hamutuk hodi haree dezafiu boot ne’ebe dadaun ne’e sira infrenta husi falesimentu saudozu Prezidente Partidu Francisco Guterres ‘Lu-olo’ dezafiu boot liu eziji ba determinasaun neebe boot liu, no dezafiu agora boot tebes tanba ne’e mak tenke hatene halo koversaun husi terus no susar ba forsa.
Sekretariu Jeral FRETILIN Mari Alkatiri dehan, ho falesimentu Prezidenti FRETILIN Francisco Guterres ‘Lu-Olo’ situasaun susar ida ne’ebe obriga tebes povu militante no kuadrus FRETILIN nian atu transforma forsa atu lao hamutuk, tanba mensajen ne’ebe prezidente partido hateten beibeik ba nia hanesan Sekretariu Jeral partido mak sira tenke hamutuk hodi servisu ba povu no nasaun nia diak, biar ida liu ida hela kontinua servisu atu hamaran povu nia mataben katak hasai povu husi mukit no kiak.
“hau lembra fali mensajen ida ne’e no mensajen ne’ebé uluk prezidente Nicolao hateten mai hau, obriga hau sai nia dehan ita hahu hamutuk bele kontinua hamutuk bele ida idak iha nia fatin labele mate hotu dala ida” dehan Sekretariu Jeral FRETILIN Mari Alkatiri iha rezidensia eis Prezidente da Repúblika saudozu Francisco Guterres Lu-olo Farol,(24/06).
Situasaun refere fo hikas fali ba nia atu simu todan tomak mak dadaun ne’e prezidente partido husik ba nia no nia prontu atu simu todan sira hotu maibe tenke iha forsa husi FRETILIN nia apoiu no tenke iha fiar tomak husi povu, nune’e sekretáriu jeral fo sasain katak saudozu Lu-Olo ema ida ne’ebe transparente no kontra tebes korupsaun neebe foti ema seluk nia sasan husi ukun nain sira, nune’e husi falesimentu saudozu Lu-Olo nian too dadaun ne’e nia rasik seida’uk iha mensajen maibe nia sei fo liafuan ruma iha loron tuir mai tanba nia mensajen ne’ebe iha emosaun uituan.
“Hau nia mensajen hau seida’uk halo hau nia mensajen nee emosi demais entaun hau hein loron ida ka rua hau hanoin aban ka bairua mak hau sei halo” dehan sekretáriu jeral FRETILIN.
Nia dehan tan, falesimentu Prezidenti FRETILIN saudozu Francisco Guterres Lu-olo nian seidauk iha desizaun ruma ba estrutura tanba FRETILIN iha orgaun barak tanba nee sei desidi liuhusi komite sentral ne’ebe nia rasik sei konvoka iha komisaun polítika nasional atu bele desidi hikas FRETILIN ba oin.
“Ne’e laos hau nia desizaun ona FRETILIN iha orgaun, kongresu komite sentral no komisaun polítika nasional neebe hau mak prezidi” dehan Marí.
Nune’e, Mari Alkatiri konsidera intervensaun governu nian ba saudozu Lu-Olo nia saude maske demora uituan maibe governu sempre akompana nia saude nune’e iha loron urjente atu lori ba tratamentu iha Malaysia Visi-Primeiru Ministru Mariano Assanami rasik mak ba rasik saudozu nia rezidensia hodi lori ba halo tratamentu iha Malaysia maibe la konsege rekopera nune’e saudozu hakotu de’it nia peregrinasaun iha mundu.
“Hau sempre iha konfiansa katak nia ba atu fila, ita la haruka nia ba atu mate, hau tuir nia apoia família” nia dehan.
Kona-ba prezensa primeiru ministro Xanana Gusmão nian iha serimonia funeral saudozu Lu-Olo nian Mari Alkatiri deklara nia rasik laiha informasaun ruma tanba dadaun primeiru ministro sei halo servisu estadu nian iha estranjeiru nune’e atu too iha Timor-Leste laos oras ida ka rua maibé lori oras naruk.
“Hau la hatene mai husi ne’ebá mai too iha nee laos oras rua nee oras ruanulu no sei iha tempu hau laiha informasaun sei mai ka la mai tempu sei iha” dehan Marí.