Reportajen Silvino Freitas
Diresaun Servisu Investigasaun Kriminál (DSIC) kaptura tan sidadaun Xineza nain 28 no sidadaun Kambodia nain 1 ne’ebe halo atividade Scaming no Game Online iha aldeia Lomkari suku Manleuana Postu Administrativu Dom Aleixo Munisipiu Dili, sidadaun hirak ne’e maioria uza viza turizmu nune’e parte polísia sei halo intevestigasaun klean ba sidadaun balun neebe over stay ona.
Portavoz PNTL Suprentidente Xefi João Belo dehan, operasaun ne’ebe parte DSIK halo iha orseik tuku 11 kalan iha aldeia Lomkari postu Dom Aleixo nian ne’ebé uma ida hetan detekta husi parte servisu migrasaun ne’ebe suspeta ba atividade ilegal nune’e DSIK ba kedas fatin refere hodi halo intervensaun no detekta kedas sidadaun Xineza 28 no sidadaun Kambodia ida ne’ebe halo hela atividade scaming nian inklui no online game, husi buska nee kaptura kedas sira hodi lori mai kedas iha DSIK.
“Evidénsia sira ne’ebe mak hetan iha fatin ne’eba maka telefone hamutuk 60 tablet samsung 2 router 3 komputador laptop 32 osan cash hamutuk $5632” dehan portavoz PNTL Suprentidente Xefi João Belo liuhusi konferensia imprensa iha Komando Jerál Kaikoli, (09/07).
Nia dehan, tan husi opersaun ne’ebe DSIK halo asegura mos sira nia pasporte hamutuk 29, nunee husi asegurasaun ne’e parte polisia sei halo prosedimentu legal liuhusi identifikasaun formal ba sidadaun estranjeiru hirak ne’e maka dadaun ne’e detein hela sela postu Dom Aleixo nian durante oras 72 nune’e sei aprezenta ba ministeriu publiku hodi prosesa ba tribunál.
“Maioria mai ho viza turizmu ne’ebe ita sei halo identifikasaun klean liu tan atu bele hatene balun over stay ona ka seida’uk, no balun halo violasaun ruma ita sei halo ba iha neeba” dehan portavoz PNTL Suprentidente Xefi João Belo.
Nia konklui katak, dadaun ne’e husi parte polisia halo hela operasaun iha parte Metiaut detekta ona sidadaun Xineza hamutuk 24 nain 7 dadaun ne’e detein ona iha DSIK no 17 dadaun ne’e iha Bekora no dadaun nee iha ona prosesu transportasaun husi Bekora mai DSIK, sidadaun sira ne’e atividade hanesan hotu scam call centre no dadaun polisia kontinua servisu makaas atu bele detekta hikas sidadaun estranjeiru sira ne’e nia paradeiru tanba tuir informasaun neebe DSIK detekta katak sidadaun balun eskapa sai ona husi fatin refere no parte polísia mos kontinua halo kooperasun ho parte emigrasaun atu labele sai husi teritoriu nasional.