Reportajen David da Costa
Polísia Nasionál Timor-Leste (PNTL), liu husi Diresaun Servisu Investigasaun Kriminál (DSIK), desmantela tan rede scam call center ida iha área Au-hun, Suku Bekora, Munisípiu Díli, no detein sidadaun estranjeiru nain rua, husi Xina no Japaun, hamutuk ho kliner feto Timoroan ida no rekolla evidénsia importante balun.
Iha Komunikadu Imprensa ne’ebe Neon Metin sita husi pagina ofisial Facebook PNTL, hateten, iha operasaun ne’ebé realiza iha Domingu (19/07) tuku 13:30 otl, ekipa DSIK hamutuk ho Diresaun Servisu Informasaun Polísia (DSIP) konsege halo identifikasaun ba sidadaun estranjeiru mane nain rua, husi nasaun Xina no Japaun, no kliner feto Timoroan ida ne’ebé hela iha fatin refere.
“Durante operasaun, autoridade sira rekolla evidénsia balun ne’ebé alegadamente utiliza ba atividade scam call center, mak kompostu husi aparellu Starlink tolu, komputador ida, banner ida, kadeira sira, dokumentu importante balun, no pasaporte sidadaun estranjeiru nain rua ne’e nian,” dehan iha pagina ofisial Facebook PNTL ne’ebé Neon Metin asesu iha Domingu 19/07.
Hafoin remata prosesu rekolla evidénsia, PNTL–DSIK transporta sasan hotu-hotu hamutuk ho ema sira ne’ebé envolve ba edifísiu DSIK iha Kuartel Jerál PNTL Cacoli, atu halo identifikasaun no investigasaun tan tuir prosedimentu legal ne’ebé vigora.
Iha operasaun ida ne’e hatudu kompromisu autoridade atu kontinua kombate krime transnasionál no atividade ilegal sira ne’ebé bele ameasa seguransa públika no estabilidade nasaun.
Autoridade mos apela ba komunidade atu kontinua koopera ho PNTL hodi fó informasaun bainhira haree ka suspeita atividade sira ne’ebé kontra lei, atu bele prevene no hapara krime organizadu iha Timor-Leste.