Reportajen Filomena da Conceicao
Estudante Timorenses husi eskola katolika ESSA Baucau, nain10 Manan Medalia 5 GOLD No 5 SILVER Iha Kompetinsaun ASEAN Student Leadership conference (ASLC) 2026, iha Singapura nune’e, Ministeiru Eduksaun orrguillu ho rezultadu husi estudante sira.
“Ha’u agradese ba Igreja, liu-liu ba Padre Aderito, no ba inan-aman sira ne’ebé foti inisiativa hamutuk ho Ministériu Edukasaun atu haruka ekipa ida tan ba Singapura. Ida-ne’e hatudu parseria di’ak entre Estadu, Igreja, eskola no família,” nia hatete Sekretariu-Jeral ba ensino sekundaria no ensino tekniku Vokasional, Domingos Lopes Lemos, iha konferénsia imprensa iha Ministeiru Eduksaun, Vila Verde, Segunda (03/08).
Nia haktuir, Delegasaun foinsa’e Timor-Leste mais uma vez lori orgullu ba nasaun hafoin hetan rezultadu estraordináriu iha eventu internasionál *ASEAN Student Leadership Conference (ASLC) 2026 ne’ebé hala’o iha Singapura, fulan kotuk.
Nia esplika, Iha kompetisaun ne’ebé halibur joven líder sira husi nasaun 10 membru ASEAN, estudante Timorense sira konsege lori fila ba rai 5 Medalla Gold ho títulu The Youth Ambassadors Award* no 5 Medalla Silver, vitoria ida-ne’e sai prova konkretu kona-ba kapasidade intelektuál, kriatividade, no kbiit lideransa jerasaun foun Timor-Leste nian iha nivel rejionál.
“Ne’e mak furak. Ita-nia oan sira hatudu katak ho espíritu apoiu-malu, sira bele kompete, bele serbisu hamutuk, no bele foti Timor-Leste nia naran ba aas,” nia esplika.
Iha kompetisaun ASLC 2026, estudante sira husi Timor-Leste partisipa ho projetu no ideia inovativu sira ne’ebé foku ba solusaun ba problema reál sira iha sosiedade, bazeia ba koñesimentu sientífiku no análize krítiku.
“Hamutuk, hamriik 10 estudante ne’e ho orientasaun husi mentór na’in rua: Camélia Agostinha Guterres, Profesorano Gabriel Fernandes dos Santos, husi SESIM” Nia heteten
Nia salienta katak, Susesu istóriku ne’e la akontese mesak maibe realizasaun ne’e hetan apoiu totál husi Família, Dirijente Eskola sira, Kongregasaun Salezianu Timor-Leste, BNCTL, no Komisaun Nasionál Timor-Leste ba UNESCO – KNTLU, Ministériu Edukasaun.
Governante ne’e rekoñese katak iha inísiu tinan ne’e orsamentu ba kompetisaun internasionál limitadu. “Ami la imajina katab labarik sira sei bele hetan susesu boot nune’e. Maibé ho kompromisu hamutuk, ita hatudu katak buat ne’e posível,” nia subliña.
Buat ida ne’ebé sai atensaun espesiál mak bainhira delegasaun to’o iha Singapura, laiha ona distinsaun Ekipa A ka Ekipa B. Tuir regra kompetisaun nian, estudante sira husi nasaun oioin kahur malu hodi forma ekipa foun 2
“Iha mundu agora, atu hetan serbisu no atu kontribui ba dezenvolvimentu, ita presiza ema ne’ebé la’ós de’it dekora faktu. Ita presiza ema ne’ebé bele aplika koñesimentu ho forma analítiku no kriativu. Iha Singapura, ita-nia estudante sira dezeña solusaun ba problema reál sira iha ita-nia rain. Ida-ne’e hatudu katak Timor-Leste la lakon ba nasaun seluk iha rejiaun,” nia afirma.
Nia enkoraja, mestre no profesór sira iha rai laran atu kontinua implementa kuríkulu ho didi’ak, liu-liu ho métodu ne’ebé halo estudante sira ativu, buka hatene no foti inisiativa. “Tanba sira mak aban bainrua sei suporta ita no sei lori ita-nia nasaun ba oin,” nia enkoraja.
ASEAN Student Leadership Conference (ASLC), nu’udar plataforma rejionál anual ne’ebé dedika ba promove edukasaun kualidade, hametin valór kriatividade, no estimula inovasaun teknolojia no sosiál ba jerasaun foun ASEAN nian.
Ministériu Edukasaun afirma kompromisu atu nafatin apoia no kria dalan ba estudante sira atu partisipa iha kompetisaun sira iha li’ur, tanba ne’e mak dalan ida ba dezenvolvimentu rekursu umanu kualidade ba Timor-Leste.
Iha fatin hanesan, estudante Leticia da Costa nu’udar manan nain ba Medalia Gold hateten Nia sente orrguillu ba oportunidade ne’ebe hetan husi eskola tanba bele aumenta nia koinesimentu hodi aprende buat foun no koinese ambiente husi nasaun seluk nian.
“Ami sente orrguillu tanba Kompetinsaun ne’e laos nasaun Timor-Leste de’it maibe iha nasaun barak mak hasoru malu hanesan Vietnam, Thailand, Malaysia, Singapura nst, no iha ne’eba ami lori Timor Nia naran bele hetan medali GOLD”, dehan Leticia.
Nia konklui, Ida ne’e hanesan fo motivasaun ba joven sira seluk katak ita mos bele, maske ita nia nasaun bele kiik maibe ita nia matenek no koinesimentu labele ki’ik, tanba ne’e ami orrguillu tanba Gold Medalia ne’e signifika Primeru lugar.