Reportazen Francisco JDA
Partidu Kmanek Haburas Unidade Nasional Timor Oan [ KUNTO] hala’o kongresu nasional badala II ho tema, KHUNTO Parseiru ba Estabilidade Desenvolvimentu no Unidade Nasional “Hahoris no Moris” ne’ebe hala’o durante loron tolu nia laran iha CCD, hosi 6 – 9 Marsu 2020.
Konseleiru Partidu KHUNTO, Naimori Bukar hateten iha deskursu katak Kongresu Partidu KHUNTO atu restrutura fila fali membru sira, hosi estrutura nasional atu halo preparasaun ba partisipa iha elisaun geral 2023 ba nasaun nia moris diak.
“Partisipa iha politika atu aprende buat ne’ebe mak diak, ita iha fiar mak hamutuk iha partidu, iha esperansa atu serbisu hamutuk, loron ida ita sei hetan rezultadu, tanba ita brani ho matenek sira ne’e atu bele lori KHUNTO ba susesu, KHUNTO mos atu aprende diak liu tan mai hosi ita nia maun sira hanesan maun Xanana, Ramos Horta, Mari Alkatiri, Taur matan Ruak, Prezidente Republika no Lere Anan Timur, sira ne’e mak sai abut no matadalan ba rai ida ne’e”, tenik Konseleiro Naimori Bukar.
Naimori Bukar hatutan militantes partidu KHUNTO, presiza tau an n udar juventude, tau imi nia an ho diak prepara ho diak loron ida povu bele fo sai lideransa, hodi serbi nasaun no povu ida ne’e, tanba lideransa la mai hosi ema matenek no riku, maibe lideransa mai hosi ema nia hahalok rasik iha kualker fatin ne’ebe deit.
