Reportajen Umbelina dos Reis
Klibur Juventude Unidade Cairedo Oan (KJUCO) hamutuk ho autoridade lokál, veteranu no komunidade sira ho voluntáriu loke dalan no harii Kampu Futebol Salaun (Futsal) iha Aldeia Cairedo, Suku Abo, Postu Administrativu Quelicai, Munísipiu Baucau, ho objetivu atu halibur no hametin juventude sira hodi kria amijade entre suku ho suku.
Prezidente Klibur Juventude Unidade Cairedo Oan, Domingos Soares dos Reis hatete katak, sira harii grupu ne’e, oinsá atu halibur juventude iha sira nia fatin hodi bele kontribui ba asaun pozitivu sira ne’ebé lori dezenvolvimentu iha baze.
“Ami juventude hahú harii grupu ne’e ho ideia diferente, maibé ami halibur malu iha fatin refere tantu feto no mane tau hanoin hamutuk oinsá harii grupu ne’e bele sai susesu ho naran KJUCO. Iha nia moto katak ‘Hamutuk ita forsa’. Tuir mai kada tinan ami selebra nia loron, ami halo programa konaba jogu futeból, kompetisaun, diskursu, no dada tali, no ami nia grupu mós halo ona solidariedade ba komunidade sira ne’ebé hetan dezastre naturais, maibé tuir ami grupu nia kbiit no forsa,” dehan Prezidente KJUCO Domingos dos Reis ba Neon Metin foin lalais.
Juventude Cairedo oan ne’e hato’o mensajen ba maluk juventude sira katak, nu’udar juventude tenki envolve aan iha grupu ka instituisaun ruma ho voluntáriu hodi aprende no buka esperiénsia, tanba liu husi voluntáriu, ita bele manan esperiénsia, sai matenek hodi dezenvolve ita nia rai rasik, tanba ita tuur hakmatek iha fatin no la envolve aan iha grupu ita sei la hetan esperiénsia.
“Tanba manan esperiénsia ka matenek hodi dezenvolve ita nia rai la’os tu-tur mosu de’it husi lalehan, liu husi terus, kolen, susar hafoin manan esperiénsia, nune’e dalan voluntariamente mak hala’o atividade ou programa balun ne’e di’ak no justu.” hateten Domingos
Iha fatin hanesan Sekretáriu grupu KJUCO, Luis Americo Soares, relasiona ho grupu no atividade KJUCO nian, nia hatete, ne’e tanba liga ho papel juventude nian nu’udár devér importante atu kontribui ba dezenvolvimentu nasaun nian. “Ami nu’udar juventude ne’ebé vizionáriu, profisionál, kriativu, saudavel, ativu no hakmatek hakarak luta ba rai ne’e hodi dezenvolve ba ita nia rai doben Timor-Leste, liu-liu iha área desportu nian. Ami mos iha misaun sira hanesan asaun edukativu, formasaun, desportu, kultura, protesaun meiu-ambiente no aktividade sosial sira.”
“Grupu refere nia objetivu loloos atu halibur juventude sira liu-liu iha baze hodi hametin ami nia relasaun entre juventude sira seluk, nune’e ita hamutuk hodi luta no kontribui ba dezenvolvimentu nasaun nian, tanba dala barak lider sira dehan juventude no foinsa’e sira mak futuru ba nasaun Timor-Leste, nune’e liu husi grupu ki’ik sira ne’e ami aprende luta hodi kontribui ne-neik ba be-beik, ita sei hamorin rai Timor nia naran.” dehan Luis
Luis informa katak, prosesu konstrusaun kampu futsal atinji ona 20 pursentu no sei konklui iha fulan Fevereiro tinan ida ne’e. “Bainhira hahú envolve aan no sai mós nu’udár inisiador ba grupu KJUCO iha tinan 2016, senti iha benefísiu lubuk hanesan abilidade lideransa, jesatun organizasaun, halo ezekusaun ba programa, kapasidade atu influénsia juventude no servisu administrasaun sira, nune’e nu’udar juventude envolve aan iha grupu refere esforsu aan hodi aprende no luta ba futuru aban bainrua nian hodi fo benefísiu ba ita aan rasik no iha sosiedade nia le’et.”
Atividade konstrusaun kampu futsal ne’e konstroi ho inisiativa Grupu KJUCO rasik no hetan apoiu fundu husi Sekretáriu Estadu Juventude no Desportu (SEJD) ho montante US $3,000.00 (dolar rihun tolu). Inklui kontribuisaun husi veteranu, inan-aman, funsionáriu no intelektual Cairedo oan hamutuk US $820.00.
