Reportazen Francisco JDA
Hafoin Covid-19 afeta mai Timor-Leste, hamosu impaktu ba ema sira, liu-liu maluk difisiensia sira, ne’ebe hapara sira nia prosesu aprendizajen iha fatin treinamentu ka kursu ruma, maske Ministeriu Edukasaun, Juventude no Desportu kria ona program eskola hosi uma, maibe programa refere la efetivu ba maluk difisiensia matan no rona, tanba sira labele asesu linha internet
Tuir Profesór Ensino Ekivalensia Ema ho Difisensia, Mafalda Fernandes Gusmao ba Neon Metin esplika Programa eskola ba uma, tuir lolos tenki hetan komunikasaun hosi Ministeriu Edukasaun nune’e bele prepara situasaun balun ba maluk difisensia sira ba prosesu aprendizajen,
“Ami hosi Diresaun Ensino Rekorente, ami atende ema ne’ebé mak idade avansadu, entaun sira susar atu hakerek ho lee, satan sira uja komunikasaun hanesan internet ida ne’e susar liu. Dalabarak ami uja lian tetum no Portuguesa, sira la dun hatene uja telefone androit, susar atu hetan telefone no halo operasaun ba telefone ne’e difikuldade tebes. Ami hanesan manorin nain susar tebes ba ami”, esplika Mafalda Fernandes Gusmao iha Kintal Boot, 28/05
Mafalda hatutan programa eskola ba uma ne’e, la asesu hosi maluk difisensia sira. Husu governu atu iha preparasaun ne’ebé di’ak, nune’e bele tulun manorin nain ne’ebe hanorin maluk difisiensia sira, bele fasilita ho di’ak liu tan.
Mafalda hatoo ba governu hodi halo preparasaun ne’ebe diak, ho nune maluk ho difisiensia sira mos bele partisipa ho diak.
“Ami ho kondisaun difisensia dalaruma sai vitima no fo impaktu ne’e boot tebes ba ami, tanba ami mós la dun hatene oinsá atu uja meius komunikasaun sira nee, nune’e eskola ne’ebé mak ami hanorin. Ami la iha livros ne’ebé atu hanorin estudante difisensia sira”, hateten Mafalda ho esperansa boot, atu maluk difisiensia sira mos iha direitu hanesan iha situasaun krize ida ne’e.