Reportazen Santina Lucia da Costa
Loron 9 Junhu nudar loron ba kada kain sira simu subsidiu ne’ebe governu oferese, tanba impaktu hosi Estadu emerjensia.
Prosesu pagamentu iha suku Comoro ba loron dahuluk, lao la tuir planu ne’ebe mak prepara ona, tanba tuir planu Xefe Suku Comoro ho ekipa prepara ona fatin ka linha keta ba ferik-katuas, inan isin rua no inan oan nurak sira, maibe realidade ne’ebe Neon Metin observa iha terenu la akontese no akontese dezetendimetu entre Xefe Suku, Xefe Aldea ho benefisiariu sira.
Situasaun ida ne’e hamosu deskontente hosi komunidade Cerefina Vicente Noronha, tanba antes tuku 8:00 dader sira marka ona prezensa iha sede suku, polisia sira mak ajuda halo linha, hodi halo separasaun maibe to’o ikus la dun hetan atendmentu diak hos suku.
Cerefina Vicente Noronha, idade 86 lamenta tebes ho Sefe Suku sira nia preparasaun, tanba sira ladun fo atendimentu di’ak ba ferik-katuas, inan isin rua ho oan nurak sira, antes atu simu sira nia direitu sira tenke terus uluk mak foin bele simu.
“Antes ne’e sira dehan ferik-katuas, feto isin rua ho oan nurak sira mak simu uluk, realidade agora dadaun sira la fo ami mak tama uluk, sira seluk maka tama uluk, oinsa ho ami, ami laiha direitu ka? ami mos iha direitu, se ami laiha diretu hatete lolos para ami ba ami nia uma. Tanba dehan ami nia direitu ne’e mak ami mai ne’e. Ami kontinua hein, karik ami hamlaha monu iha ne’e karik oinsa”, tenik Cerefina ba Neon Metin.
Tuir observasaun Neon Metin, antes ne’e xefe suku sira prepara fatin, tau liña ketak ba ferik-katuas, inan isin rua no inan oan nurak sira no sira mak tenke simu uluk, maibe realidade sai oinseluk.
Ho situasaun ne’ebe akontese, benefisiarius sira hakarak bolu tuir naran ka lista ne’ebe mak iha ona, to’o ikus Xefe Suku ho Xefe Aldeia halo tuir duni hanoin ida ne’e no la fo prioridade uluk ba ema sira ne’ebe vulneravel liu.