Reportazen Tome da Costa
Bee Moos kontinua sai preokupasaun komunidade tanba labele asesu bee moos, maske estadu hatene bee moos nudar direitu fundamentu ema hotu nian, realidade iha fatin barak komunidade balun labele asesu bee mos.
Neon Metin halo observasaun direita iha aldeia Moris Dame, iha suku Bairo Pite iha uma kain hamutuk 300 resin mak la asesu bee moos durante tinan naruk nia laran.
Neon Metin dadalia ho Xefe Aldeia Moris ba Dame, Joao de Carvalho Godinho, hatoo sira nia preokupasaun katak durante ne’e hato’o bebeik ona preokupasaun parte SAS, no sira dada ona paralon no meteran, maibe realidade to’o ohin loron bee laiha.
“Komunidade sira seidauk asesu ba bee moos, tanba meteran sira ne’ebe diresaun Saniamentu ba monta balun sai at deit no paralon sira nee balun ne’ebe satan iha Estrada, kareta sama to’o belar hotu, tanba bee laiha, halo komunidade sira balun tenke fura rasik sira nia bee hodi konsumu no balun tenke sosa deit husi kareta sira ne’ebe faan bee moos no dalaruma balun tenke lao ain deit ho distansia neebe dook mak foin hetan bee moos ba sira atu konsumu no vijihnu sira lori deit sira nia jerigen ba kuru iha Xefe Aldea nia uma”, hateten Xefe Aldeia Joao ba Neon Metin, 27/08.
Xefe Aldeia hatutan maske governu hateten bebeik ona katak tau prioridade bee moos, tanba bee mak hun ba ema nia moris no saude ema nian, maibe realidade hatudu katak iha kapital Dili fatin barak mak seidauk asesu bee moos, governu koalia deit maibe implementasaun laiha.
Iha sorin seluk komunidade Olandina Caero hateten problema neebe sira hasoru mak bee moos, tanba tinan naruk ona sira la asesu bee moos, halo sira tenke lao ain ba kuru deit iha parte tanki Japaun nia ou dalaruma sira sosa deit husi kareta ne’ebe faan bee moos.
“Bee neebe sira sosa husi kareta ho presu $15-$20, dalaruma sira nia osan laiha entaun sira tenke lao ain ho kilo metro ida ho balun, hodi ba kuru deit tanba paralon ne’ebe SAS ba dada no tau hela meteran bee nian maibe to’o agora bee laiha no paralon ho meteran sira neebe sira ba tau balun komesa at ona, tanba bee laiha”, tenik Olinda ba Neon Metin
Olinda husu ba governu atu tau atensaun ba problema bee moos ne’ebe komunidade sira hasoru, tanba tinan naruk nia laran sei halerik bebeik ba bee moos.