Komisaun Organizadora Lalibur sei organiza seminar loron sorin no kalan kultural hodi selebra Loron Nasional Kultura mak monu iha loron 14 Outubru. Loron ida ne’e mos marka nudar loron moris Fransisco Borja da Costa, poeta, jornalista no ativista ida.
Komunikadu imprensa hosi Lalibur Borja nian mak publika horiseik, 12/10, hato’o kona ba atividade mak sei halao. Komisaun Organizadora sei organiza semináriu kona-ba Francisco Borja da Costa nia obra ba dezenvolvimentu kultura nasionál. Orador sira ba seminar ne’e mak Roque Rodrigues, Francisco Borja da Costa nia belun, Hérica Pinheiro, kandidatu Ph.D iha Universidade Coimbra, no Virgilio Guterres, Prezidente Konsellu Imprensa.
Komunikadu ne’e mo hatete katak sei lansa lansa livru Francisco Borja da Costa: Poeta, Jornalista no Ativista. Seminariu ho lansamentu livro sei hala’o iha 13 Outubru iha Centro Nacional Chega, oras 14:00.
Hamutuk ho seminário no lansamentu livro ne’e komisaun organizadora mos sei halo Kalan Kulturál iha Arquivo e Múseu da Resistência Timorense, iha 14 Outubru 2020, tuku 17:00-22:00 ho aprezentasaun live painting, teatru, múzika no deklamasaun poézia Francisco Borja da Costa ninian.
Komunikadu ne’e hatete mos katak, liuhusi komemorasaun ne’e, ita bele hanoin hikas fila fali no hatutan obra Francisco Borja da Costa nian liuliu relasiona ho dezenvolvimentu kultura nasionál. Tempu ba timoroan hotu-hotu atu hatuur kultura nu’udar komponente prinsipál ba hametin unidade nasionál liuhusi programa dezenvolvimentu ne’ebé estruturadu no sistemátiku. So liuhusi dalan ne’e mak ita bele hametin filafali orgullu nasionál nu’udar Timoroan.
Lalibur Borja nu’udar komisaun organizadora ida ne’ebé kompostu husi individu no organizasoins ne’ebé iha interese iha arte no literatura atu komemora Loron Nasionál ba Kultura no nu’udar loron-moris Francisco Borja da Costa nu’udar pensadór prinsipál luta libertasaun nasionál nian ne’ebé bele hatene liuhusi nia obra sira nu’udar poeta, jornalista no ativista.
Francisco Borja da Costa no líder FRETILIN sira iha tempu ne’ebá utiliza kultura nu’udar komponente prinsipál ba unidade nasionál. Borja da Costa, pensadór prinsipál ida iha luta libertasaun nasionál, dedika nia an tomak nu’udar protagonista ida iha luta libertasaun nasionál. Borja da Costa la’ós hakerek de’it poezia, produtu jornalístiku no planu dezenvolvimentu maibé mós sai fundadór ASDT/FRETILIN no líder ida hodi partisipa iha programa sosiál no polítika FRETILIN ninian.