Reportazen Santina Lucia da Costa
Kooperativa Multi-Setorial Nurak Sulin Hamutuk ne’ebe produz tasi been ba bee-moos hasoru malu ho Prezidente Republika, Dr. Francisco Guterres Lu-Olo hodi hato’o agradesimentu tanba iha loron nasional juventude 12 Novembru 2020 no nudar loron masakre santa cruz, Prezidente Republika rekoñese atividade Kooperativa Multi-Setorial Nurak Sulin Hamutuk.
Hafoin hasoru malu ho Prezidente Republika ba jornalista sira, Prezidente Kooperativa Multi-Setorial Nurak Sulin Hamutuk, Olivio da Cruz Pinto hateten Prezidente Republika rekoñese atividade Kooperativa Multi-Setorial Nurak Sulin Hamutuk, ne’ebe Prezidente hatoo oha loron nasional Juventude.
Olivio da Cruz Pinto dehan haree fali ba progresu durante tinan rua ka tolu nia laran, mudansa ne’ebé boot mai sira, liga mós ba iha parte produsaun ninian katak, volume ka kuantidade ne’ebé durante tinan kotuk nian, kada semana sira produz 50 ka 60 galong, kompara ho agora kada loron sira produz 35-40 galong.
Nia hatoo katak ohin loron mudansa klimatika no ita sedauk hatene impaktu mudansa klimatika iha futuru, karik bee moos sei menus, ho nune’e grupu ne’e hanoin katak uza dalan seluk hodi halo produsaun bee moos hosi tasi been sai bee moos.
“Ohin loron ita tenki tau prioridade ba ida ne’e, ho nune’e ba futuru di’ak liu prevene duke kura”, hateten Olivio iha palasio prezidensia, 12/01.
Nia dehan husi rezultadu ne’ebé mak iha, ami estuda iha Universidade Nasional Timor-Lorosa’e (UNTL), husi kolega Luciano, Departamentu Quimica no hau Departamentu Fizika, “ami na’in rua hamutuk ho kolega sira, oinsa tane ba oin, maske agora la vale maibé ba futuru sei vale ba ema hotu no sei koresponde ba ita hotu nia moris. Grupu ne’e eziste iha tinan 2017 no lansamentu iha tinan 2019”.
Nia afirma uluk uma-kain 50 mak konsumu, mais agora uma kain besik rihun mak konsumu, bee ne’e marka tasi Liquisa Imuk, bee-moos ne’e agora dadaun lori ona ba kios ki’ik oan sira no sira mak sai parseiru oinsa mak atu bele fa’an. Kios hamutuk 18. Iha Dili laran seidauk prekore tanba tuir kapasidade sistema no transporte.
Iha fatin hanesan Manajer Kooperativa Multi-Setorial Nurak Sulin Hamutuk, Luciano dos Santos Pereira, informa presu ba bee-moos galong ida $1.00, maibé haree ba iha Estadu Emerjensia komunidade laiha osan fa’an ba $0.50 sentavus, agora fa’an la hanesan ho vendedor seluk, tanba iha engrapamentu ne’ebé mak fa’an $0.75 sentavus, iha ne’eba mós ema ne’ebé fa’an fó gratuita durante nia fa’an, no komunidade ne’ebé ba sosa iha kios mak $1.00
Nia konfesa katak membru sira ne’ebe serbisu iha grupu ne’e kuaze tinan tolu ona no laiha vemsimentu ka sedauk simu salariu, osan ne’ebe hetan hodi hola foos hodi rai fatin produsaun, nune’e ekipa sira bele tein hodi han, nune’e bele hamoris Sistema
Luciano dos Santos Pereira hateten durante ne’e hamutuk ho oan hosi veteranus sira ne’ebe mate ona, husik hela sira nia oan ho feen, sira laiha eskola, ami bolu sira hamutuk hodi halo atividade ne’e.
“Amai sujere oinsa governu ida ne’e bele apoiu sira, tanba sira nia aman luta ba rai ne’e, entaun sira nia oan mós hakarak luta ba dezenvolvimentu iha rai ida ne’e, ami husu governu apoiu ba sira eskola”, deklara Luciano.
Iha deskursu Prezidente Republika nian ne’ebe hatoo iha loron 12 Novembru 2020 hateten sei tau mós prioridade ba Kooperativa Multi-Setorial Nurak Sulin Hamutuk ne’ebé produz tasi been ba bee-moos ba Futuru, nia dehan katak laos sai ezekutador ida ne’e, maibé nafatin sei tau prioridade ba futuru katak, ne’e interese komun ba povu no ba rai doben ida ne’e.