Reportazen David da Costa Gusmao
Minstro Saude re-integra pasiente afetadu COVID-19 nain rua ne’ebe rekuperadu ba familia. Liu husi konferensia imprensa Koordenador pilar VII COVID-19, Dr.Nilton do Carmo da Silva infroma ba jornalista katak iha loron 19 Janeiru re-integra pasiente COVID-19 nain rua ba nia familia sira no atual baixa iha sala izolamentu hela nain-5 no kazu foun laiha.
“Ita laiha kazu foun, maibe iha kazu rekuperadu nain rua ne’ebe ita halo teste ikus iha horseik no rezultadu negativu”, dehan Dr. Nilton ba jornalista sira iha palacio da cinzas, 19/01.
Nia esplika katak pasiente nain-2 ne’e mai hosi claster ne’ebe hanesan, nain rua ne’e mai ho aviaun Malasya nian iha loron 22 Dezembru 2020, lori ba iha kuarentina depois iha 27 Dezembru halo teste swab no positivo COVID-19.
“Durante baixa iha sala isolamentu halo teste ba dala rua, teste ikus sira nain-2 iha loron 18 Janeru 2021, ba sira nain rua negativu hotu. Hosi sira nain rua ne’e seksu mane hotu, ida idade 33 sidadaun pakistaUN no seluk idade 42 sidadaun timoroan”, hateten Dr. Nilton
Ministeru Saude mos husu ba sidadun nain rua ne’e, atu nafatin kuarentina iha uma no kumpri medida prevensaun tuir protokolu Ministeru Saude no Organizasaun Mundial Saude nian.
Entertantu dadus akumulativu 18,102, hein rezultadu 301, akumulativu kazu 52, rekoperadu foun 2, total rekoperadu 47, kazu foun 0, atual baixa 5, rezultadu negativu17.149.
Total kuarentina 106 kompostu Dili 28, muncipiu 78, auto kuarentina 93 kompostu Dili 89, muncipiu 4 no pasa ona loron 14 ne’e 7.331 kompostu Dili 6.070 no muncipiu 1.261.
Tuir dadus global hosi Organizasaun Mundial Saude (OMS) hatudu katak kazu akumulatiu iha 93,956,883, kazu foun ba loron 19 Janeiru 323,712 no numeru ema mate iha 2,029,084 no kazu foun ema ne’ebe mate iha loron 19 Janeiru tuir dadus global total 6,478.
