Reportazen Santina Lucia da Costa
Ministru Defeza, Filomeno da Costa Paixão de Jesus, halo enkontru mensal ho Prezidente Republika, Dr. Francisco Guterres Lu-Olo, hodi relata situasaun Defeza Forsas Armadas nian, ne’ebe durante fulan ne’e laiha dezenvolvimentu ne’ebé maka’as liu, maibé preokupa hela ho implementasaun orsamentu.
Hafoin enkontru Ministru Defeza ba jornalista hateten durante fulan ne’e laiha dezenvolvimentu ne’ebé maka’as liu, no preokupa hela ho implementasaun kona-ba orsamentu, liu-liu ba infrastruturas, kona-ba bens serbisu no mós salariu ba pesoal sira. Nune’e relata mos kona-ba reuniaun Konsellu Defeza Militar jeral ho mós Kompanias tomak ba Prezidente Republika.
Ministru Filomeno da Costa Paixão de Jesus hateten, Prezidente Republika nia apresiasaun ba enkontru ne’e, haree katak dezenvolvimentu bele lao iha komandu ho defeza, dezenvolvimentu lao di’ak, no hein de’it kona-ba implementasaun orsamentu ba oin.
Kona-ba rekrutamentu membru F-FDTL, Ministru Defeza informa katak prosesu rekrutamentu ba membru foun F-FDTL, aprovadu 600 kandidatus ba rekrutamentu tinan 2021, embora propoin 1200 maibé orsamentu sufisiente de’it ba tinan ne’e ho rekrutamentu 600.
Total orsamentu ba Ministeriu Defeza no F-FDTL hamutuk $43,669,625 milloens. Orsamentu ba Defeza iha $18,497.896 milloens, Orsamentu ba F-FDTL $25,171,729 milloens. Hosi total orsamentu $43,669,625 inklui ona rekrutamentu ba F-FDTL ba ema nain 600
“Total orsamentu Minsiteriu Defeza ho FFDTL iha $43,669,625 millioens, ne’e inklui ona orsamentu ba rekrutamentu FFDTL hamutuk 600, komesa iha formalidade ne’ebé ita kumpri portantu Jeneral sei hato’o proposta formal mai, hau sei hato’o ba konsellu Ministru”, informa Ministru Defeza ba jornalista sira iha Palasiu Prezidensial, Nicolau-Lobato, Bairu-Pite, 16/02.