Reportazen Zevonia Vieira
Ho akontesementu bainhira mane ida iha sala isolamentu Tasi Tolu tenta hafuhu inan feto ida ho nia oan feto ne’ebe atu haris, halo pasiente feto sira ne’ebe iha hela iha sala isolamentu Tasi Tolu sente preokupa no la seguru ba situasaun refere.
Neon Metin halo konfirmasaun ho Centro Integradu Jestaun Krize (CIJK) karik halo ona asaun ruma atu hare mekanismu haris fatin publiku, ne’ebe la garante ema atu sente seguru bainhira ba haris fatin, ba Neon Metin Koordenador Forsa-Tarefa ba Prevensaun no Mitigasaun Surtu COVID-19 iha Timor Leste, Dr. Rui Maria de Araújo liu hosi zoom press conference hateten katak parte Centro Integradu halo ona esforsu no polisia rasik mos halo ona investigasaun ba kazu ne’ebe akontese ona loron hirak liu ba.
Iha mane ida tenta atu hafuhu inan feto ida ho nia oan feto idade 13 ne’ebe haris iha haris fatin Kuarentea Tasi Tolu iha loorn 22/03, oras tuku 16:00 lorokraik.
Situasaun ne’ebe vitima ho naran inisial MC, konfesa ba Neon Metin via telefone katak iha mane ida ne’ebe tenta atu hafuhu nia ho nian oan bainhira atu haris, ne’ebe akontese iha loron 22 Marsu, oras 16:00. Ba kazu ida ne’e halo feto maluk sira seluk mos komesa la sente seguru.
Dadus jeral ba kazu foun COVID-19 ba loron ohin hamutuk 21, kazu rekuperadu nain 1, kazu ativu 247, hosi kazu nain 21 ohin, iha mane nain 11, feto nain 10, ema sintomátiku nain 4, ema asintomátiku nain 17. Hosi horiseik to’o ohin loron halo teste PCR hamutuk 971.