Reportazen Zevonia Vieira
Ministeriu Saude (MS) Deteta tan Kazu konfirmadu foun COVID-19 hamutuk 21, iha Dili nain 20 no iha Baucau nain ida. liu hosi zoom press conference, loron 24 Marsu, Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo, relata ba jornalista sira katak evolusaun surtu COVID-19 iha municipio Dili deteta kazu konfirmadu nain 20 ho detalles tuir mai katak kazu pozitivu 3, hela iha Aldeia Bidau Mota-klaran, Suku Bidaun Santana, Postu Administrativu Cristo Rei, pozitivu hirak ne’e kontaktu-besik ho kazu iha cluster hanesan, ne’ebé anunsía horiseik.
Kazu pozitivu 7, hela iha Aldeia 20 de Setembro, Suku Bebonuk, Postu Administrativu Dom Aleixo pozitivu hirak ne’e kontaktu-besik ho kazu iha cluster hanesan. Kazu pozitivu 4, hela iha Aldeia Sagrada Familia, Suku Bidau Santana, Posto Administrativu Cristo Rei, pozitivu hirak ne’e kontaktu-besik ho kazu iha cluster Too Baru II.
Kazu pozitivu 2, hela iha Aldeia Bekusi-Sentru, Suku Becora, Posto Administrativu Cristo Rei, pozitivu sira ne’e, 1 kontaktu besik ho kazu ida iha cluster 20 de Setembro, 1 kontaktu-besik ho kazu iha cluster HNGV.
Kazu positivu 1, iha fatin quarentena Hotel Ramelau. Kazu ida ne’e hela iha Aldeia Ramelau. Ekipa konjunta sei buka-tuir hela ligasaun ho cluster sira ne’ebé iha ona. Kazu pozitivu 1, hela iha Aldeia 30 de Agosto, Suku Comoro, Postu Administrativu Dom Aleixo, pozitivu ida ne’e deteta iha atividade vijilánsia sentinel iha Sentru Saúde Comoro. Ekipa konjunta sei buka tuir hela ninia ligasaun ho cluster sira seluk.
Kazu pozitivu 1, hela iha Aldeia Metin I, Suku Comoro, Postu Administrativu Dom Aleixo, pozitivu ida ne’e kontaktu-besik husi kazu ida iha cluster 20 de Setembro 2. Kazu Pozitivu 1, hela iha Aldeia 02, Suku Fatuhada, Postu Administrativu Dom Aleixo, pozitivu ida ne’e deteta iha atividade vijilánsia sentinel iha Sentru Saúde Comoro. Ekipa konjunta sei buka tuir hela ninia ligasaun ho cluster sira seluk Ho nune’e, kazu detetadu ka pozitivu iha Munisipiu Dili husi loron 7 Marsu 2021, to’o ohin 24 Marsu 2021, hamutuk 217.
Iha Baucau ohin deteta kazu foun nain 1, kazu ida ne’e kontaktu besik husi iha Aldeia Builé Suku Babú. Hamutuk hotu iha Baucau iha 20 Kazus detetadus.
Kazu detetadu 217 iha Dili ne’e, fahe ba cluster 42, namkari iha instituisaun 4, eventu nain ida no fatin kuarentena 2, suku 14, iha Postu Administrativu D. Aleixo, Vera Cruz, Nain Feto & Cristo Rei. Husi cluster 42 ne’e, iha cluster 14 maka semana 1, loron loron 6, la iha kazu foun.
Cluster 20 de Setembro, Suku Bebonuk, husi dia 14 to’o ohin sei ativu nafatin. Total iha ona 57 kazus detetadus. Iha loron 10 nia laran aumenta husi kazu detetadu nain 2 ba 57. Husi 57 kazus ne’e, mane 23, feto 34, idade tinan 14 mai kra’ik nain 9, idade tinan 15-59 nain 47, idade 60 ka ka bo’ot liu nain 1
Dadus jeral kazu ba loron ohin hamutuk 21, kazu rekuperadu nain 1, kazu ativu 247, hosi kazu nain 21 ohin, iha mane nain 11, feto nain 10, ema sintomátiku nain 4, ema asintomátiku nain 17. Hosi horiseik to’o ohin loron halo teste PCR hamutuk 971.
