Home Feature Pasiente COVID-19 Konta nia Esperiensia Hosi Fatin Isolamentu Ba Neon Metin

Pasiente COVID-19 Konta nia Esperiensia Hosi Fatin Isolamentu Ba Neon Metin

957
0
fatin isolamentu Tasi Tolu. [Foto: Dokumentu Neon Metin | 24.03.2021]

Reportazen Zevonia Vieira

Ambulansia hakat besik dadauk mai uma, nian lian besik tan deit, hodi mai tula pasiente COVID-19 ba fatin isolamentu. Farda mutin, taka ulun metin no luvas tun hosi ambulansia hodi bolu pasiente refere hakat ba kareta laran.

Ida ne’e mak akontese iha sidadad Dili laran, bainhira komunidade ka ema ida pozitivu COVID-19 liu hosi swab test ho naran A polymerase chain reaction (PCR) test, bainhira rezultadu pozitivu, ekipa vijilansia sira tula ema ne’ebe konfirmadu hodi bele sala isolamentu, ho objetivu virus ne’ebe iha nia isin lolon laran labele hadaet ba ema seluk, liu-liu ba ema sira ne’ebe idade boot, iha moras seluk ne’ebe fo risku ba nia moris.

Neon Metin dada lia ho pasiente COVID-19 ne’ebe konfirmadu pozitivu iha loron 18 Marsu, no agora dadauk iha sala isolamentu Tasi Tolu.

Ba Neon Metin nia haktuir lalaok bainhira nia konfirmadu pozitivu COVID-19

“Hau agora dadauk iha isolamentu, esperensia nebe hau hetan iha kondiasaun isolamentu nian mak iha buat balu diak no buat balu mak ladiak”, dehan ME naran inisial ba Neon Metin 23/03.

Nia hatutan fatin ne’ebe governu prepara hodi nia deskansa, nia mesak hela iha kuartu ida, iha kama esposa, lensol no sumasu

“Maske fatin deskansa diak, maibe ita deskansa susar ituan tamba barulhu liu. Fatin deskansa kuartu ne so ba ema ida hanesan hau pesoal, maibe kuandu familia ida tomak,  susar oituan tamba kama ne kiik no familia ida la sufisiente atu deskansa iha kama kiik ne’e. Tamba iha ne’e familia barak los mak kona virus ne’e.  Hau pesoal senti tauk liu tamba hau mesak deit no hau dok husi familia no hau senti moras ruma hau la koalia sai tamba hau laiha familia iha ne’e, tamba ne’e hau sempre husu hau nia an,  bainhira mak sai”, tenik ME ho laran triste, ho esperansa bele sai lalais hosi sala isolamentu.

ME fiar katak virus Corona ne’e iha duni, hosi sintomas ne’ebe mosu hanesan hahu mear, isin manas no inus been hatudu duni rezultadu pozitivu COVID-19

“Sim, bau hau pesoal virus Corona ne’e iha duni, fofoun hau senti mak isin manas, isin moras no oin nakukun, halo hau fraku depois hau ba konsulta hau hetan swab test, liu loron rua hau foin rona resultadu katak hau pozitivu, maibe kuandu hau rona rezultadu hau kondisaun saude diak hotu ona, la isin manas ona,” konfesa ME.

Nia informa ba Neon Metin katak nia hela ona loron 9 nia laran iha sala isolamentu Tasi Tolu, maibe to’o sedauk iha meduku ida mak mai halo tratamentu ba nia no laiha ekipa psikolojia halo atendimentu.

Ba Neon Metin ME hatoo lia menon ba maluk timoroan hotu, atu kontinua lao tuir protokolu COVID-19, hodi preven-an hosi COVID-19.

Nia husu ba Ministeriu Saude atu husu parte mediku sira, hodi ba hare sira iha fatin isolamentu, tanba to’o agora parte mediku la ba kontrola sira, “sira lori hau mai, hatudu deit kuartu mak ne’e deit, hau husu ba parte mediku,  atu mai hare ami iha isolamentu ne’e,  par ami bele komprede no hetan tratamentu ruma husi mediku sira”.

ME mos konfesa katak haris fatin publiku ne’ebe governu harii iha sala isolamentu Tasi Tolu la dun seguru ba feto sira, tanba haris fatin ne’e mane ho feto sira uza hotu, tanba iha loron 22 Marsu iha akontesementu ida iha haris fatin, bainhira inan feto no nia oan atu haris, no iha mane ida tenta hafuhu hosi haris fatin sorin.

“Ami presiza moris seguru mos iha fatin isolamentu, atu labele halo ami stress liutan no paniku ho akontesementu sira seluk, ne’ebe halo feto sai vitima”, tenik ME

Print Friendly, PDF & Email

LEAVE A REPLY

Please enter your comment!
Please enter your name here